ଅନୁଗୁଳ,ଏଜେନ୍ସି: ସୋସିଆଲ ମିଡ଼ିଆରେ କରୋନାକୁ ନେଇ ଗୁଜବ ପ୍ରଚାର କରି ବନ୍ଧାହେଲେ ଯୁବକ। କୋରୋନାରେ ଆକ୍ରାନ୍ତ ହୋଇ ଜଣେ ଯୁବକ ମୃତ୍ୟୁବରଣ କରିଥିବା ଗୁଜବ ପ୍ରଚାର କରି ତାଳଚେରର ଜଣେ ଯୁବକଙ୍କୁ ଗିରଫ କରିଛି କୋଲିୟରୀ ପୁଲିସ୍ ।
ଯୁବକ ଜଣଙ୍କ କରୋନା ରୋଗରେ ଜିଲ୍ଲାରେ ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଥିବା ନେଇ ସୋସିଆଲ ମିଡ଼ିଆରେ ମିଥ୍ୟା ଖବର ପ୍ରଚାର କରିଥିଲା। ସୂଚନା ଅନୁସାରେ, ଜିଲ୍ଲାର ନୂଆହତା ଗାଁର ଜଣେ ଯୁବକଙ୍କର ଦିଲ୍ଲୀ ସ୍ଥିତ ଏକ ଡାକ୍ତରଖାନାରେ କରୋନାରେ ମୃତ୍ୟୁ ହୋଇଥିବା ନେଇ ଗିରଫ ଯୁବକ ଜଣକ ନିଜ ଫେସବୁକ୍ ଆକାଉଣ୍ଟରେ ପୋଷ୍ଟ କରିଥିଲେ। ଏହାକୁ ନେଇ ସ୍ଥାନୀୟ ଅଞ୍ଚଳରେ ଲୋକଙ୍କ ମଧ୍ୟରେ ଭୟ ସୃଷ୍ଟି ହୋଇଥିଲା। ତେବେ ଏହା ଗୁଜବ ବୋଲି ଜଣାପଡ଼ିଥିଲା। ବିଶ୍ବସ୍ତ ସୂତ୍ରରୁ ଖବର ପାଇ ପୁଲିସ ତଦନ୍ତ କରି ସମ୍ପୃକ୍ତ ଯୁବକଙ୍କୁ ଗିରଫ କରିଥିବା ଉତ୍ତର-କେନ୍ଦ୍ରାଞ୍ଚଳ ଆଇଜି ନରସିଂହ ଭୋଳ ସୂଚନା ଦେଇଛନ୍ତି। ଗିରଫ ଯୁବକର ନାଁ ଜୟକୃଷ୍ଣ ସାହୁ ବୋଲି ପଚରାଉଚରାରୁ ଜଣାପଡ଼ିଛି। ତେବେ ଆଗକୁ ଏଭଳି ଗୁଜବ ପ୍ରଚାର ନ କରିବାକୁ ଆଇଜି ଜନସାଧାରଣଙ୍କୁ ନିବେଦନ କରିଛନ୍ତି।
