ଫୁଲବାଣୀ,ଏନ୍ଏନ୍ଏସ୍: ଫୁଲବାଣୀ ସହରର ସ୍ଥାନୀୟ ଜିଲ୍ଲା କ୍ରୀଡ଼ା କାର୍ଯ୍ୟାଳୟରେ ନେହେରୁ ଯୁବ କେନ୍ଦ୍ର ଫୁଲବାଣୀ ତରଫରୁ ଆନ୍ତର୍ଜାତିକ ଯୋଗ ଦିବସ ଲାଗି ଯୋଗଭ୍ୟାସ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଉକ୍ତ କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ଏସଡିପିଓ ମହେନ୍ଦ୍ରନାଥ ମୁର୍ମୁ ଯୋଗ ଦେଇଥିବାବେଳେ ସମ୍ମାନିତ ଅତିଥି ଭାବେ ଅବସରପ୍ରାପ୍ତ ଆର୍ମି ଅଫିସର ବିଷ୍ଣୁ ପ୍ରସାଦ ମିଶ୍ର, କ୍ରୀଡ଼ା ଅଧିକାରୀ ଜିତେନ୍ଦ୍ର କୁମାର ମହାକୁଡ଼, ପୂର୍ବତନ ବ୍ଲକ ଅଧ୍ୟକ୍ଷ ବୀରେନ୍ଦ୍ର କହ୍ନର, ଖେଳ ଶିକ୍ଷକ ତପନ ଚନ୍ଦ୍ର ଧଳ, ରାକେଶ ବିଶୋଇ, ଶିକ୍ଷକ ସୁନିତା ଡିଗାଲ, ସନ୍ତୋଷ କୁମାର ମିଶ୍ର ଓ ପାର୍ଥସାରଥୀ ମଲ୍ଲିକ ପ୍ରମୁଖ ଯୋଗ ଦେଇଥିଲେ । ଏଥିରେ ଫୁଲବାଣୀ ବ୍ଲକର ବିଭିନ୍ନ ସ୍କୁଲର ଛାତ୍ରଛାତ୍ରୀ ଓ ଯୁବକ ସଂଘର ସଭ୍ୟସଭ୍ୟା ସାମିଲ ହୋଇଥିଲେ । ଏହି ଅବସରରେ ଯୋଗ ଉପରେ ଏକ କୁଇଜ ପ୍ରତିଯୋଗିତା ଅନୁଷ୍ଠିତ ହୋଇଥିଲା । ଏଥିରେ ସତ୍ୟସାଇ ହାଇସ୍କୁଲର ପ୍ରବୀଣ କୁମାର କହ୍ନର ପ୍ରଥମ, ଏଜେଓ ହାଇସ୍କୁଲର ଶିବ ପ୍ରସାଦ ପଣ୍ଡା ଦ୍ୱିତୀୟ ଓ ସତ୍ୟସାଇ ହାଇସ୍କୁଲର ଚିକୁନୁ ନାୟକ ତୃତୀୟ ହୋଇଥିଲେ । ବିଜୟୀ ପ୍ରତିଯୋଗୀଙ୍କୁୁ ଟ୍ରଫି ଓ ପ୍ରମାଣ ପତ୍ର ଦେଇ ପୁରସ୍କୃତ କରାଯାଇଥିଲା । ଯୋଗଗୁରୁ ଭାବରେ ପ୍ରଶାନ୍ତ ଦାଶ ଯୋଗଦେଇ ଛାତ୍ରଛାତ୍ରୀ ଓ ଯୁବ ଭାଇଭଉଣୀଙ୍କୁ ଯୋଗ ତାଲିମ ପ୍ରଦାନ କରିଥିଲେ ।
