ଇସ୍ତାନବୁଲ୍,ଏଜେନ୍ସି: ଟୋକିଓ ଅଲିମ୍ପିକ୍ସ ବ୍ରୋଞ୍ଜ୍ ପଦକ ବିଜୟିନୀ ଲଭ୍ଲିନା ବୋରଗୋହେନ୍ ବିଶ୍ୱ ମହିଳା ବକ୍ସିଂ ଚାମ୍ପିଅନ୍ଶିପ୍ କମାଲ୍ କରିଛନ୍ତି । ଲଭ୍ଲିନା ଲାଇଟ୍ ମିଡିଲ୍ୱେଟ୍ ବର୍ଗରେ ପୂର୍ବତନ ବିଶ୍ୱ ଚାମ୍ପିଅନ୍ ଚେନ୍ ନିଏନ୍-ଚିନ୍ଙ୍କୁ ହରାଇ ସୋମବାର ଏଠାରେ ଚାଲିଥିବା ଚାମ୍ପିଅନ୍ଶିପ୍ର ପ୍ରିକ୍ୱାର୍ଟର୍ ଫାଇନାଲ୍ ପର୍ଯ୍ୟାୟକୁ ଉନ୍ନୀତ ହୋଇଛନ୍ତି । ଭାରତର ଏହି ଯୁବ ବକ୍ସର୍ ଗତବର୍ଷ ଟୋକିଓ ଅଲିମ୍ପିକ୍ସରେ ବ୍ରୋଞ୍ଜ୍ ପଦକ ଜିତିବା ପରେ ପ୍ରଥମ ଥର ଏହି ଟୁର୍ଣ୍ଣାମେଣ୍ଟ୍ରେ ଭାଗ ନେଉଛନ୍ତି । ଲଭ୍ଲିନା ୭୦ କିଗ୍ରା ବର୍ଗରେ ଚୀନା ତାଇପେଇ ବକ୍ସର୍ଙ୍କୁ ସ୍ପ୍ଲିଟ୍ ବା ଖଣ୍ଡିତ ନିଷ୍ପତ୍ତି ୩-୨ରେ ହରାଇଥିଲେ । ଏହା ନିଏନ୍ଙ୍କ ବିପକ୍ଷରେ ଲଭ୍ଲିନାଙ୍କ ଦ୍ୱିତୀୟ ବିଜୟ ।
ପୂର୍ବରୁ ଟୋକିଓ ଅଲିମ୍ପିକ୍ସର କ୍ୱାର୍ଟର୍ ଫାଇନାଲ୍ରେ ସେ ନିଏନ୍ ଚେନ୍ଙ୍କୁ ହରାଇଥିଲେ । ପୂର୍ବରୁ ଟୁର୍ଣ୍ଣାମେଣ୍ଟ୍ର ୨୦୧୮ ଓ ୨୦୧୯ ସଂସ୍କରଣରେ ଦୁଇଟି ବ୍ରୋଞ୍ଜ୍ ପଦକ ଜିତିଥିବା ଆସାମର ୨୪ ବର୍ଷୀୟା ବକ୍ସର୍ ପରବର୍ତ୍ତୀ ମ୍ୟାଚ୍ରେ ଚାମ୍ପିଅନ୍ ଇଂଲଣ୍ଡର ତିନିଥର ଜାତୀୟ ଚାମ୍ପିଅନ୍ ସିଣ୍ଡି ଏନ୍ଗାମ୍ବାଙ୍କୁ ଭେଟିବେ । ୪ ଜଣ ଭାରତୀୟ ବକ୍ସର୍ ଶିକ୍ଷା (୫୪ କିଗ୍ରା), ମନିଷା (୫୭ କିଗ୍ରା), ଅଙ୍କୁଶିତା (୬୬ କିଗ୍ରା) ଓ ନନ୍ଦିନୀ (ଯୁକ୍ତ ୮୧ କିଗ୍ରା) ସେମାନଙ୍କ ବର୍ଗର ପ୍ରଥମ ରାଉଣ୍ଡ୍ରେ ବାଇ ହାସଲ କରିଛନ୍ତି । ୨୦୧୯ରେ ରୁଷିଆରେ ଅନୁଷ୍ଠିତ ଚାମ୍ପିଅନ୍ଶିପ୍ର ଶେଷ ସଂସ୍କରଣରେ ଭାରତ ଗୋଟିଏ ରୌପ୍ୟ ଓ ୩ଟି ବ୍ରୋଞ୍ଜ୍ ପଦକ ଜିତିଥିଲା ।
