ଭଦ୍ରକ,ଏନ୍ଏନ୍ଏସ୍ : ବାଂଶଡା ଥାନା ଅଧିନସ୍ଥ ଚଡଦିଆ ଗ୍ରାମରେ ଗ୍ୟାସ୍ ଟାଙ୍କି ଲିକ୍ ହେବାରୁ ନିଆଁ ଲାଗି ଜଣେ ମହିଳାଙ୍କର ମୃତ୍ୟୁ ହୋଇଛି। ଏଥି ସହିତ ୬ ବଖରା ଘର ପୋଡି ଯାଇଛି। ମୃତ ମହିଳା ହେଉଛନ୍ତି ତୁଷାରକାନ୍ତ ମହାଳିକଙ୍କ ପତ୍ନୀ ପୂର୍ଣ୍ଣିମା।
ସୂଚନା ଅନୁଯାୟୀ, ୬ ମାସ ପୂର୍ବରୁ ତୁଷାରକାନ୍ତ ପୂର୍ଣ୍ଣିମାଙ୍କୁ ପ୍ରେମ ବିବାହ କରିଥିଲେ । ସୋମବାର ପୂର୍ବାହ୍ନ ପ୍ରାୟ ୮ ଘଟିକାରେ ଏହି ଅଘଟଣ ଘଟିଛି । ମହିଳା ଜଣକ ଗ୍ୟାସରେ ରୋଷେଇ କରୁଥିବା ସମୟରେ ଗ୍ୟାସ୍ ଟାଙ୍କି କୌଣସି କାରଣରୁ ଲିକ୍ ହୋଇଥିଲା । ଫଳରେ ନିଆଁ ଲାଗି ଘର ଜଳିଯିବା ସହ ଘଟଣା ସ୍ଥଳରେ ମହିଳାଙ୍କର ମୃତ୍ୟୁ ହୋଇଛି । ଏହି ନିଆଁ ପାଖ ପଡୋଶୀ ଘରକୁ ବ୍ୟାପୀ ଥିଲା । ଫଳରେ ପଡୋଶୀ ଦୁର୍ଯ୍ୟୋଧନ ମହାଳିକ, ସୁରେନ୍ଦ୍ର ମହାଳିକ, ଶରତ ମହାଳିକଙ୍କ ଚାଳ ଛପର ଘର ଜଳି ପୋଡି ପାଉଁଶ ହୋଇଛି ।
ଚାନ୍ଦବାଲି ଅଗ୍ନିଶମ କର୍ମଚାରୀ ସେଠାରେ ପହଂଚିଲା ବେଳକୁ ନିଆଁ ଲିଭି ଯାଇଥିଲା । ଏହି ଅଗ୍ନିକାଣ୍ଡ ପାଇଁ ଏମାନଙ୍କ ଘରେ ଥିବା ଧାନ, ଚାଉଳ, ଟଙ୍କା ପଇସା, ଦରକାରୀ କାଗଜ ପତ୍ର, ଘରବାରି, ଜମିର ଖଜଣା ପାଉତି, ପଟ୍ଟା ଆଦି ଜିନିଷ ନଷ୍ଟ ହୋଇଛି । ଚାନ୍ଦବାଲି ତହସିଲଦାର ସତ୍ୟଜିତ୍ ରାଉତ, ଚଡଦିଆ ଆର.ଆଇ. ନିହାର ରଞ୍ଜନ ଦାସ ସେଠାରେ ପହଁଚି ଘଟଣାର ସ୍ଥିତି ପରଖିଛନ୍ତି । ମୃତ୍ୟୁକୁ ନେଇ ଥାନାରେ ଏକ ଅପମୃତ୍ୟୁ ମାମଲା ପଞ୍ଜିକରଣ ହୋଇଥିବା ଥାନା ଅଧିକାରୀ ସୂଚନା ଦେଇଛନ୍ତି ।
