ବାରିପଦା,ଏନ୍ଏନ୍ଏସ୍: ଆଜି(ସୋମବାର) ଭାଲେଣ୍ଟାଇନ ଡେ’ ବା ପ୍ରେମ ଦିବସକୁ ମୟୂରଭଞ୍ଜ ରାସଗୋବିନ୍ଦପୁର ବ୍ଲକ ତୋଟାପଡା ଗ୍ରାମରେ ନିଆରା ଢଙ୍ଗରେ ପାଳିଛନ୍ତି। ତୋଟାପଡା ଗ୍ରାମବାସୀ ଏହି ଦିନକୁ ମାତୃପିତୃ ଦିବସ ଭାବେ ପାଳନ କରିଛନ୍ତି।
ଭାଲେଣ୍ଟାଇନ୍ସ ଡେ’ର ସପ୍ତାହେ ଆଗରୁ ଆରମ୍ଭ ହୋଇଯାଏ ବିଭିନ୍ନ ଡେ’ର ସେଲିବ୍ରେସନ। ଆଜିଠୁ ଆରମ୍ଭ ହୋଇଛି ଭାଲେଣ୍ଟାଇନ୍ସ ଓ୍ୱିକ୍। କିନ୍ତୁ ମୟୁରଭଞ୍ଜ ଜିଲ୍ଲା ରାସଗୋବିନ୍ଦପୁର ବ୍ଲକ ତୋଟାପଡା ଗ୍ରାମରେ ମାତୃପିତୃ ପୂଜନ ଦିବସ ପାଳନ କରାଯାଇଛି। ସାରା ବିଶ୍ବ ଭାଲେଣ୍ଟାଇନ ସପ୍ତାହ ପାଳନ କରୁଥିବା ସମୟରେ ଭାଲେଣ୍ଟାଇନ୍ସ ଦିବସ ବିପକ୍ଷରେ ଏଭଳି ଏକ ପ୍ରୟାସ ବୁଦ୍ଧିଜୀବୀଙ୍କ ମହଲରେ ପ୍ରଶଂସାର କେନ୍ଦ୍ରବିନ୍ଦୁ ପାଲଟିଛି।
ଏହି ଗ୍ରାମରେ ବିଗତ ୫ ବର୍ଷ ଧରି ଏହି ସପ୍ତାହରେ ମାତୃ ପିତୃ ପୂଜନ ଦିବସ ପାଳନ କରାଯାଉଛି। ପ୍ରତିବର୍ଷ ଏପରି କରିବା ସହ ଅନ୍ୟମାନଙ୍କୁ ଏପରି କରିବାକୁ ଏକ ବାର୍ତା ପ୍ରଦାନ କରିଛନ୍ତି ଗ୍ରାମବାସୀ ମାନେ। ପିଲାମାନେ ପ୍ରତିଦିନ ମାତାପିତାଙ୍କୁ ପ୍ରଣାମ କରିବା ସହିତ ଭାଲେଣ୍ଟାଇନ ଦିବସ ଦିନ ପୂଜନ କରିବେ ବୋଲି ଶପଥ ଗ୍ରହଣ କରିଥିଲେ।
