କେନ୍ଦୁଝର,ଏନ୍ଏନ୍ଏସ୍: ପୋଖରୀରେ ଭାସୁଥିବା ଅବସ୍ଥାରେ ଅଜଣା ମହିଳାଙ୍କର ମୃତଦେହ ଉଦ୍ଧାର। କେନ୍ଦୁଝର ଟାଉନ ଥାନାର ନରଣପୁର ଗାଁର ହାଟପଡିଆ ଛକ ନିକଟରେ ଥିବା ଏକ ପୋଖରୀକୁ ଭାସୁଛି ଏହି ମୃତଦେହ। ଗାଧୁଆ ପାଧୁଆ କରିବାକୁ ଗାଁ ଲୋକେ ଆସିବା ସମୟରେ ପୋଖରୀରେ ଏକ ମହିଳାଙ୍କର ମୃତଦେହ ଭାସୁଥିବା ଦେଖିବାକୁ ପାଇଥିଲେ।
ଖବରଟି ପ୍ରଚାର ହେବା ମାତ୍ରେ ସେଠାରେ ଶହ ଶହ ସଂଖ୍ୟାରେ ଲୋକ ରୁଣ୍ଡ ହୋଇଥିଲେ ଓ ପୁଲିସ ଏବଂ ଅଗ୍ନିଶମ ବାହିନୀକୁ ଖବର ଦେଇଥିଲେ। ଘଟଣା ସ୍ଥଳରେ ପୋଲିସ ଓ ଅଗ୍ନିଶମ ବାହିନୀ ପହଞ୍ଚି ପୋଖରୀରୁ ମହିଳାଙ୍କର ମୃତଦେହ ଉଦ୍ଧାର କରିଥିଲେ। ମହିଳା ଜଣଙ୍କ ନାଲି ଶାଢ଼ୀ ପିନ୍ଧିଥିବା ବେଳେ ହାତ ରେ ଶଙ୍ଖା ଓ ମୁଣ୍ଡରେ ସିନ୍ଦୁର ଥିବାରୁ ସେ ଜଣେ ସଧବା ମହିଳା ବୋଲି ଜଣାଯାଏ। ତାଙ୍କର ବୟସ ପଚାଶ ରୁ ପଞ୍ଚାବନ ମଧ୍ୟରେ ହେବ ବୋଲି ଅନୁମାନ କରାଯାଏ।
ଏହା ସହ ହାତରେ ସୁନାର ଶଙ୍ଖା ଥିବାରୁ ସେ ଜଣେ ସଂଭ୍ରାନ୍ତ ପରିବାର ର ମହିଳା ବୋଲି ଅନୁମାନ କରାଯାଏ। ନରଣପୁର ଅଞ୍ଚଳର ସରପଞ୍ଚଙ୍କ ସହ ସେ ଅଂଚଳର ଲୋକେ ମହିଳା ଜଣଙ୍କୁ ଜାଣିନାହାନ୍ତି ଓ ଏହି ଅଞ୍ଚଳର ନୁହେଁ ବୋଲି କହିଛନ୍ତି। ତେବେ ମହିଳାଙ୍କୁ କେହି ହତ୍ୟା କରି ଆଣି ଏଠାରେ ଫୋପାଡି ଦେଇଥାଇପାରେ ବୋଲି ଅନୁମାନ କରାଯଉଛି। ନଚେତ ଶୌଚ ବା ଗାଧେଇବା ପାଇଁ ଆସି ପୋଖରୀ ରେ ବୁଡିଯାଇଥାଇପାରନ୍ତି ବୋଲି ଅନୁମାନ ମଧ୍ୟ କରାଯାଉଛି। ପୁଲିସ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇ ମୃତ୍ୟୁର କାରଣ ଖୋଜୁଛି।
