ଦେବଗଡ଼,ଏନ୍ଏନ୍ଏସ୍: ବାରକୋଟ ଥାନାଞ୍ଚଳ ଦେଇ ପ୍ରବାହିତ ହେଉଥିବା ବ୍ରାହ୍ମଣୀ ନଦୀରେ ଆଜି ସକାଳୁ ଏକ ଅଚିହ୍ନା ବ୍ୟକ୍ତିର ମୃତ ଦେହ ଭାସୁଥିବା ଦେଖିବାକୁ ମିଳିଛି। ନଦୀର ଉପର ମୁଣ୍ଡରେ ଗତ କିଛି ଦିନ ଧରି ଲଗାଣ ବର୍ଷା ଯୋଗୁଁ ବନ୍ୟାଜଳରେ ବ୍ରାହ୍ମଣୀ ନଦୀ ଫୁଲିଉଠିଛି। ଏହି ବନ୍ୟା ଜଳରେ ଅନେକ ଗୋରୁ ଗାଇର ମୃତ ଶରୀର ସହ ଏକ ଅଜଣା ବ୍ୟକ୍ତିର ମୃତ ଦେହ ବାରକୋଟ ଠାରେ ଥିବା ବ୍ରାହ୍ମଣୀ ନଦୀର ପୁରୁଣା ପୋଲରେ ଲାଖିଥିବା ଦେଖିବାକୁ ମିଳିଛି। ସୂଚନା ପାଇ ବାରକୋଟ ଥାନା ପୁଲିସ ଉକ୍ତ ଅଜଣା ମୃତ ଶରୀରକୁ ଉଦ୍ଧାର କରୁଥିବା ଜଣାପଡ଼ିଛି। ଏହି ଅଜଣା ମୃତ ଦେହଟି ୫୦ରୁ ୫୫ ବର୍ଷର ହୋଇଥିବା ଅନୁମାନ କରାଯାଉଛି।
