ସମ୍ବଲପୁର,ଏନ୍ଏନ୍ଏସ୍: ସମ୍ବଲପୁର ଜିଲ୍ଲା ପ୍ରଶାସନ ଥାନା ପରମାଣପୁରରେ ମଙ୍ଗଳବାର ଭୋରରେ ଏକ ଅଭାବନୀୟ ଘଟଣା ଘଟିଯାଇଛି। ୩ଟି ଉଠା ଦୋକନରେ ଉପରେ ଟ୍ରକ ମାଡ଼ି ଯାଇ ୪ଜଣଙ୍କର ମୃତ୍ୟୁ ଘଟିଛି। ସୂଚନା ଅନୁସାରେ, ଜିଲ୍ଲାର ଶାସନ ଥାନା ଅନ୍ତର୍ଗତ ପରମାନପୁରରେ ଧନୁଯାତ୍ରା ପାଇଁ ମୀନାବଜାର ପଡ଼ିଛି। ଏଥିପାଇଁ ରାସ୍ତାପାର୍ଶ୍ବରେ ବ୍ୟବସାୟୀମାନେ ଅସ୍ଥାୟୀ ଦୋକାନ ଖୋଲି ବ୍ୟବସାୟ କରୁଥିଲେ।
ସୋମବାର ରାତିରେ ଦୋକାନୀମାନେ ଦୋକାନ ବନ୍ଦ କରି ଶୋଇବା ପରେ ଭୋରରେ ଏକ କୋଇଲା ବୋଝେଇ ଟ୍ରକ୍ ୩ଟି ଉଠା ଦୋକାନ ଉପରେଚଢିଯାଇଥିଲା। ଏହି ସମୟରେ ସେଠାରେ ଥିବା ଅନ୍ୟ ଦୋକାନୀମାନେ ଉଠିଯାଇଥିଲେ। ଏହି ଦୁର୍ଘଟଣାରେ ୪ଜଣଙ୍କ ମୃତ୍ୟୁ ହୋଇଥିବା ବେଳେ ୩ଜଣ ଗୁରୁତର ଆହତ ହୋଇଛନ୍ତି। ମୃତକମାନେ ହେଲେ ସମ୍ବଲପୁର ପେନସନପଡ଼ାର ମହମ୍ମଦ ସାୟତ, ମହମ୍ମଦ ତେୟତ, ୱାକାର ଆଲମ ଏବଂ ମହମ୍ମଦ ୟାନିସ। ଘଟଣାର ଖବର ପାଇ ପୁଲିସ ସେଠାରେ ପହଞ୍ଚି ମୃତ ଦେହ ଜବତ କରିବା ସହ ଗୁରୁତରଙ୍କୁ ବୁର୍ଲା ମେଡ଼ିକାଲରେ ଭର୍ତ୍ତି କରାଯାଇଛି। ସେହିପରି ଦୁର୍ଘଟଣା ଘଟାଇଥିବା ଟ୍ରକକୁ ପୁଲିସ ଜବତ କରିଥିବା ବେଳେ ଡ୍ରାଇଭର ଫେରାର ହୋଇଯାଇଥିବା ଜଣାପଡ଼ିଛି। ଏହି ଘଟଣା ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି।
