ଟ୍ରକ ଓ ବାଇକ ମୁହାଁ ମୁହିଁ, ସୁପ୍ରଭାଇଜର ମୃତ

କୋରାପୁଟ,ଏନ୍ଏନ୍ଏସ୍: ବୋରିଗୁମ୍ମା ଥାନା ଅନ୍ତର୍ଗତ ଟିକ ବାଲିଗୁଡା ନିକଟରେ ଆଜି ଏକ ମର୍ମନ୍ତୁଦ ସଡକ ଦୁର୍ଘଟଣା ଘଟିଛି। ଏକ ଟ୍ରକ ସହ ବାଇକର ମୁହାଁ ମୁହିଁ ହୋଇଥିବା ଜଣାପଡ଼ିଛି। ଏଥିରେ ବାଇକ୍ ଚାଳକର ମୃତ୍ୟୁ ହୋଇଛି। ମୃତ ବ୍ୟକ୍ତିଙ୍କ ନାମ ଚନ୍ଦନ ପାଣ୍ଡେ, ତାଙ୍କ ଘର ବିହାର ଅଞ୍ଚଳରେ।

ସୂଚନା ଅନୁସାରେ ରବିବାର ଅପରାହ୍ନ ୩ଟାରେ ଟ୍ରକ୍(ଓଆର୍-୩୦-୪୬୧୧) ନାମକ ଟ୍ରକଟି ମଣ୍ଡିରୁ ଧାନ ନେବା ପାଇଁ କାମତା ଯାଉଥିବା ବେଳେ ଟିକ ବାଲିଗୁଡା ନିକଟରେ ବାଇକ ନଂ(ଓଡ଼ି-୧୦ଏମ୍-୦୨୩୭) ସହ ମୁହାଁ ମୁହିଁ ଧକ୍କା ହୋଇଥିଲା। ଫଳରେ ଯୁବକ ଜଣକ ଭାରସାମ୍ୟ ହରାଇ ଟ୍ରକ ଚକ ତଳେ ପଶି ଯାଇଥିଲେ। ଘଟଣା ସ୍ଥଳରେ ହିଁ ଯୁବକଙ୍କ ମୃତୁ ହୋଇଥିଲା। ବୋରିଗୁମ୍ମା ପୁଲିସ ଘଟଣାସ୍ଥଳରେ ପହଞ୍ଚି ମୃତ ଦେହ ଜବତ କରିଛି।

ମୃତକ ବ୍ୟକ୍ତି ଜଣଙ୍କ ମେଗା ଜଳ ପ୍ରୋଜେକ୍ଟରେ ସୁପ୍ରଭାଇଜର ଭାବେ କାମ କରି ଆସୁଥିଲେ। ତେବେ ଆସନ୍ତା କାଲି ଶବ ବ୍ୟବଚ୍ଛେଦ ପରେ ତାଙ୍କ ପରିବାର ବର୍ଗକୁ ହସ୍ତାନ୍ତର କରାଯିବ ବୋଲି ତଦନ୍ତକାରୀ ଅଧିକାରୀ ଏଏସଆଇ ପ୍ରଫୁଲ୍ଲ କୁମାର ସାହୁ ସୂଚନା ଦେଇଛନ୍ତି। ସେହିପରି ଟ୍ରକ ଡ୍ରାଇଭର ଫେରାର ଥିବା ଜଣାଯାଇଛି।