ଲୁଟେରାଙ୍କ ଟାର୍ଗେଟରେ ଶିକ୍ଷକଙ୍କ ଘର, ବିଲମ୍ବିତ ରାତିରେ ପୁଣି ଦୁଇ ଶିକ୍ଷକଙ୍କ ଘରୁ ଲୁଟ

ପାଟଣା,ଏନ୍ଏନ୍ଏସ୍: କେନ୍ଦୁଝର ଜିଲ୍ଲା ତୁରୁମୁଙ୍ଗା ଥାନା ଅଧୀନସ୍ଥ ଖିରେଇଟାଙ୍ଗିରି ଗ୍ରାମରେ ଶୁକ୍ରବାର ବିଳମ୍ବିତ ରାତ୍ରିରେ ଦୁଇ ଶିକ୍ଷକଙ୍କ ଘରୁ ଲୁଟ ହୋଇଥିବା ଜଣାଯାଇଛି। ସୂଚନା ଅନୁସାରେ ୪୯ନଂ ଜାତୀୟ ରାଜପଥ ଖିରେଇଟାଙ୍ଗିରି ଗ୍ରାମର ଦୁଇ ଶିକ୍ଷକ ଜଗବନ୍ଧୁ ନାଏକ ଓ ନିତ୍ୟାନନ୍ଦ ମହାନ୍ତଙ୍କ ଘରେ ଲୁଟେରା ପଶି ଆଲମୀରା ଭାଙ୍ଗି ଲକ୍ଷାଧିକ ଟଙ୍କାର ସୁନା ଗହଣା ଓ ନଗଦ ଟଙ୍କା ଲୁଟିନେଇଛନ୍ତି।

ଅଭିଯୋଗ ପରେ ଘଟଣାସ୍ଥଳରେ ତୁରୁମୁଙ୍ଗା ପୁଲିସ ପହଞ୍ଚି ଛାନଭିନ୍ ଆରମ୍ଭ କରିଛି। ଅନୁରୂପ ଭାବେ ଗୁରୁବାର ଦିନ ଶିକ୍ଷକ ଦୁର୍ଯ୍ୟୋଧନ ସାହୁଙ୍କ ଘରୁ ଚୋରି ହୋଇଥିବା ଗତକାଲି ପୁଣି ୨ ଶିକ୍ଷକଙ୍କ ଘରେ ଚୋରି ହୋଇଛି। ଯାହାକୁ ନେଇ ଲୁଟେରାମନେ ଶିକ୍ଷକଙ୍କ ଘରକୁ ଟାର୍ଗେଟ କରିବା ସହ ପୁଲିସକୁ ଖୁଲମଖୁଲା ଚ୍ୟାଲେଞ୍ଜ ଦେଇ ଚୋରି କରୁଥିବା ସାଧାରଣରେ ଚର୍ଚ୍ଚା ହେଉଛି।

ତେବେ ତୁରନ୍ତ ଉକ୍ତ ଲୁଟେରାମାନଙ୍କୁ ଧରିବା ସହ ରାତ୍ରିକାଳୀନ ପାଟ୍ରୋଲିଂକୁ କଡ଼ାକଡ଼ି କରିବା ପାଇଁ ଅଞ୍ଚଳବାସୀ ଦାବି କରିଛନ୍ତି।