ନୂଆଦିଲ୍ଲୀ: ବଲିଉଡ଼ର ଦିବଙ୍ଗତ ଅଭିନେତା ସୁଶାନ୍ତ ସିଂହ ରାଜପୁତଙ୍କୁ ‘ପଦ୍ମ ଭୂଷଣ’ ସମ୍ମାନରେ ସମ୍ମାନିତ କରିବା ପାଇଁ ମୁମ୍ବାଇର ଏକ ଏନଜିଓ ଦାବି କରିଛି। ସୁଶାନ୍ତଙ୍କୁ ପଦ୍ମ ଭୂଷଣ ଆୱାର୍ଡ ପ୍ରଦାନ କରିବା ପାଇଁ ମହାରାଷ୍ଟ୍ର ସରକାରକୁ ଏନଜିଓ ପକ୍ଷରୁ ଚିଠି ଲେଖାଯାଇଛି। ଏନଜିିଓର ଅଧ୍ୟକ୍ଷ ପୃଥ୍ୱୀରାଜ ମସ୍କେ କହିଛନ୍ତି ଯେ,‘ସୁଶାନ୍ତଙ୍କୁ ଆୱାର୍ଡ ପ୍ରଦାନ କରିବା ପାଇଁ ଆମେ ପଦ୍ମ କମିଟୀର ଚେୟାରମ୍ୟାନ୍ ଆଦିତ୍ୟ ଠାକରେଙ୍କ ନିକଟରେ ଦାବି କରିଛୁ।’
ମସ୍କେ ଆହୁରି କହିଛନ୍ତି କି, ‘ ସୁଶାନ୍ତ ସିଂହ ରାଜପୁତ ଜଣେ ଯୁବ ଓ ପ୍ରତିଭାବାନ କଳାକାର ଥିଲେ। ବିହାରର ଏକ ଛୋଟ ଜିଲ୍ଲାରୁ ମୁମ୍ବାଇ ଆସି ଟିଭି ସିରିୟଲ ଜରିଆରେ ଅଭିନୟ କ୍ୟାରିୟର ଆରମ୍ଭ କରି ନିଜର ଅଦମ୍ୟ ପରିଶ୍ରମ ଓ ପ୍ରତିଭା ବଳରେ ସଫଳତା ହାସଲ କରିଥିଲେ। ଅଭିନୟ ଜରିଆରେ ସେ ଏମିତି ଲୋକପ୍ରିୟତା ହାସଲ କରିଥିଲେ କି ମୃତ୍ୟୁ ପରେ ବି ଆଜି ଲକ୍ଷାଧିକ ଫ୍ୟାନ୍ ତାଙ୍କୁ ମନେ ପକାଉଛନ୍ତି। ଆଶା କରୁଛି କି ଆଦିତ୍ୟ ଠାକରେ ଆମ ଦାବିକୁ ସ୍ୱୀକାର କରିବା ସହ ଲକ୍ଷାଧିକ ଫ୍ୟାନଙ୍କ ଭାବନାକୁ ବୁଝିବେ।’
ସୂଚନାଯୋଗ୍ୟ, ଏହାପୂର୍ବରୁ ବିହାରର ଜିତନ ରାମ ମାଁଝୀଙ୍କ ହିନ୍ଦୁସ୍ତାନ ଆବାମ ମୋର୍ଚ୍ଚା ସୁଶାନ୍ତଙ୍କୁ ପଦ୍ମଶ୍ରୀ ପ୍ରଦାନ କରିବାକୁ ଦାବି କରିଥିଲେ।
