ବଲାଙ୍ଗିର,ଏନ୍ଏନ୍ଏସ୍: ନିକଟରେ ବଲାଙ୍ଗିର ଜିଲ୍ଲାସ୍ଥିତ ଠେଲକୋମୁଣ୍ଡା ସ୍କୁଲ୍ ପରିସରରେ ସ୍କୁଲ୍ ସମୟରେ ଶିକ୍ଷକ ଶିକ୍ଷୟିତ୍ରୀ ଚିକେନ୍ ଭୋଜି କରି ଖାଉଥିବାର ଏକ ଫଟୋ ଭାଇରାଲ ହେବାପରେ ଏବେ ଛାତ୍ରଛାତ୍ରୀଙ୍କ ଦ୍ୱାରା ସ୍କୁଲରେ କାମ କରାଯାଉଥିବା ୨ଦୁଇଟି ଫଟୋ ଭାଇରାଲ୍ ହୋଇଛି। ଗୋଟିଏ ଫଟୋରେ ଛାତ୍ରମାନେ ସ୍କୁଲର ୟୁରିନାଲ ସଫା କରୁଥିବା ଦେଖିବାକୁ ମିଳିଥିବା ବେଳେ ଆଉ ଏକ ଫଟୋରେ ଅଙ୍ଗନବାଡ଼ି କେନ୍ଦ୍ରର ପିଲାମାନେ ମାଚିସ୍ କିଣିବାକୁ ଯାଉଥିବା ଦେଖିବାକୁ ମିଳିଛି। ସୂଚନାନୁସାରେ ଲୋଇସିଂହା ବ୍ଲକ୍ ଘୁଙ୍ଗି ପ୍ରାଥମିକ ବିଦ୍ୟାଳୟର ଛାତ୍ରମାନେ ଖାଲି ହାତରେ ୟୁରିନାଲ୍ ସଫା କରୁଛନ୍ତି। ନିୟମିତ ଭାବେ ସେମାନଙ୍କୁ ୟୁରିନାଲ୍ ସଫେଇ କାର୍ଯ୍ୟରେ ବ୍ୟବହାର କରାଯାଉଥିବା ପିଲାମାନେ ଅଭିଯୋଗ କରିଛନ୍ତି।
ସେହିପରି ଦଶପୁର ଅଙ୍ଗନବାଡି କେନ୍ଦ୍ରର ୨ଜଣ ଛାତ୍ର ରାସ୍ତା ପାର୍ ହୋଇ ମାଚିସ କିଣିବାକୁ ଯାଉଛନ୍ତି। କେନ୍ଦ୍ରରୁ ଚାଉଳ ନେଇ ସେମାନେ ମାଚିସ କିଣିବାକୁ କହିଥିବା ବେଳେ ଏଥିପାଇଁ ସେମାନଙ୍କୁ ଦିଦି ପଠାଇଥିବା କହିଛନ୍ତି। ହେଲେ ଅଙ୍ଗନବାଡ଼ି ଦିଦି ଆରତୀ ବାରିକ ଏହାକୁ ଅସ୍ୱୀକାର କରିଛନ୍ତି। ହୁଏତ ହେଲପର ପଠାଇଥିବେ ବୋଲି କହିଛନ୍ତି। ତେବେ ଘଟଣା ସମ୍ପର୍କରେ ଅନୁସନ୍ଧାନ କରାଯିବ ବୋଲି ସୁପରଭାଇଜର ରଜନୀ ରାଣୀ ମେହେର କହିଛନ୍ତି।
