ଜୟପୁର: ରାଜସ୍ଥାନରେ ମର୍ମନ୍ତୁଦ ସଡକ ଦୁର୍ଘଟଣା । ୩ଟି ଟ୍ରକ ମୁହାଁମୁହଁ ଧକ୍କା ହେବାରୁ ଅଗ୍ନିକାଣ୍ଡ ଘଟି 5ଜଣ ଜୀବନ୍ତ ଦଗ୍ଧ । ଜୟପୁର ଆଜମେର ଜାତୀୟ ରାଜପଥପର ଡୁଡୁ ଗ୍ରାମରେ ଏପରି ଘଟଣା ଘଟିଥିବା ସୂଚନା ମିଳିଛି । ଏକାଧିକ ଗୋରୁ ଅଗ୍ନିକାଣ୍ଡରେ ଜଳିଯାଇଥିବା ଜଣାପଡିଛି ।
ମିଳିଥିବା ସୂଚନା ଅନୁଯାୟୀ, ବୁଧବାର ସନ୍ଧ୍ୟା ସମୟରେ ରାଜସ୍ଥାନର ଡୁଡୁ ଅଞ୍ଚଳରେ ତିନିଟି ଟ୍ରକ ମୁହାଁମୁହିଁ ଧକ୍କା ହୋଇଥିଲା । ଫଳରେ ତିନିଟି ଟ୍ରକରେ ଅଗ୍ନିକାଣ୍ଡ ଘଟିଥିଲା । ଟ୍ରକ ଭିତରେ ଥିବା ୫ଜଣଙ୍କର ମୃତ୍ୟୁ ହୋଇଥିବା ବେଳେ ଟ୍ରକରେ ବୋଝେଇ ହୋଇଥିବା ଏକାଧିକ ଗୋରୁ ମଧ୍ୟ ନିଆଁରେ ଜଳିଯାଇଥିଲେ । ଏନେଇ ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି । ଏହି ଦୁର୍ଘଟଣାରେ କେତେ ଜଣ ଆହତ ହୋଇଛନ୍ତି ସେନେଇ ସୂଚନା ହସ୍ତଗତ ହୋଇନାହିଁ ।
୫ ମୃତକଙ୍କ ମଧ୍ୟରୁ ତିନିଜଣ ହରିୟାଣାର ବାସିନ୍ଦା । ସେମାନେ ହେଉଛନ୍ତି ପଓ୍ବାନ, ସଞ୍ଚୁ ଓ ଧର୍ମବୀର ଏବଂ ଅନ୍ୟ ୨ ଜଣ ବିହାର ରାଜ୍ୟର ଜାନ ବିଜୟ ଓ ବିଜଲି । ଦୁଇଟି ଟ୍ରକ ରାସ୍ତା କଡରେ ପାର୍କିଂ ହୋଇ ଛିଡା ହୋଇଥିଲେ । ଏହି ସମୟରେ ଅନ୍ୟ ଏକ ଗୋରୁ ବୋଝେଇ ଟ୍ରକ ହରିୟାଣାରୁ ପୁଣେକୁ ଯାଉଥିବା ବେଳେ ରାସ୍ତାରେ ଛିଡା ହୋଇଥିବା ଦୁଇ ଟ୍ରକକୁ ଧକ୍କା ଦେଇଥିଲା । ଫଳରେ ଘଟଣା ସ୍ଥଳରେ ୩ଟି ଟ୍ରକରେ ନିଆଁ ଲାଗିଯିବାରୁ 5ଜଣ ଜୀବନ୍ତ ଦଗ୍ଧ ହୋଇଯାଇଥିଲେ ।
