ରୁଦ୍ରାକ୍ଷ ହାଇଟେକ ସମ୍ମିଳନୀ କକ୍ଷରେ ଲାଗିଛି ୧୦୮ ଆଲୁମିନିୟମ ରୁଦ୍ରାକ୍ଷ
- ନୂଆଦିଲ୍ଲୀ: ଭାରତ-ଜାପାନ ବନ୍ଧୁତ୍ୱର ପ୍ରତୀକ ରୁଦ୍ରାକ୍ଷ ହାଇ-ଟେକ୍ ସମ୍ମିଳନୀ କେନ୍ଦ୍ରର ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ ହୋଇ ଆଜି ଉଦଘାଟନ ହୋଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ବାରାଣାସୀରେ ଏକ ଅତ୍ୟାଧୁନିକ ସମ୍ମିଳନୀ କେନ୍ଦ୍ରର ଉଦଘାଟନ କରିଛନ୍ତି। ଉଦଘାଟନ ସମୟରେ ସେ କହିଛନ୍ତି, ତାଙ୍କ ସଂସଦୀୟ ନିର୍ବାଚନମଣ୍ଡଳୀ ବାରାଣାସୀରେ ସମ୍ମିଳନୀ ପାଇଁ ଏହା ଏକ ଆକର୍ଷଣୀୟ ଗନ୍ତବ୍ୟସ୍ଥଳ ହେବ ଏବଂ ପର୍ଯ୍ୟଟକ ଓ ବ୍ୟବସାୟୀଙ୍କୁ ଆକର୍ଷିତ କରିବ। ପ୍ରଧାନମନ୍ତ୍ରୀ ତାଙ୍କ ଟ୍ୱିଟର ଆକାଉଣ୍ଟରେ ଆକାଶମାର୍ଗରୁ ବିଲ୍ଡିଂର ନିଆଯାଇଥିବା କିଛି ଫଟୋ ମଧ୍ୟ ସେୟାର କରିଛନ୍ତି।
ଟ୍ୱିଟରେ ପ୍ରଧାନମନ୍ତ୍ରୀ ଲେଖିଛନ୍ତି, ବାରାଣାସୀରେ ରୁଦ୍ରାକ୍ଷ ସମ୍ମିଳନୀ କେନ୍ଦ୍ରର ଉଦଘାଟନ କରି ମୁଁ ଆନନ୍ଦିତ। ଜାପାନିଜ ସହାୟତାରେ ନିର୍ମିତ ଏହି ଅତ୍ୟାଧୁନିକ କେନ୍ଦ୍ର ବାରାଣାସୀଙ୍କୁ ସମ୍ମିଳନୀ ପାଇଁ ଏକ ଆକର୍ଷଣୀୟ ଗନ୍ତବ୍ୟସ୍ଥଳ କରିବ ଯାହାଦ୍ୱାରା ଅଧିକ ପର୍ଯ୍ୟଟକ ଏବଂ ବ୍ୟବସାୟୀମାନେ ସହରକୁ ଆସିବାକୁ ଆକର୍ଷିତ ହେବେ।
କନଭେନସନ ସେଣ୍ଟରର ନାଁ ‘ରୁଦ୍ରାକ୍ଷ’ ଥିବା ବେଳେ ଏହି କେନ୍ଦ୍ରରେ ୧୦୮ ରୁଦ୍ରାକ୍ଷ ସ୍ଥାପନ କରାଯାଇଛି। ଏଠାରେ ଏକା ସାଙ୍ଗରେ ୧୨୦୦ ଲୋକ ଏକାଠି ବସିବାକୁ ସକ୍ଷମ ହେବେ। ଏହାର ନିର୍ମାଣରେ ପ୍ରାୟ ୧୮୬ କୋଟି ଟଙ୍କା ଖର୍ଚ୍ଚ ହୋଇଥିବାବେଳେ ଏଥିରେ ବ୍ୟବହୃତ ଚେୟାରଗୁଡିକ ଭିଏତନାମରୁ ଆସିଛି। ୩ ଏକର ଜମି ଉପରେ ନିର୍ମିତ ଏହି ବିଶାଳ ଭବନରେ ଆଲୁମିନିୟମରେ ନିର୍ମିତ ୧୦୮ଟି ବଡ଼ ରୁଦ୍ରାକ୍ଷ ସ୍ଥାପିତ ହୋଇଛି ଯାହା ଏହାର ସୌନ୍ଦର୍ଯ୍ୟକୁ ବହୁଗୁଣିତ କରୁଛି। କାଶୀ ପରିଦର୍ଶନ କରିବାକୁ ଆସୁଥିବା ପର୍ଯ୍ୟଟକମାନେ ଏହି ବିଲଡିଂରେ ସଙ୍ଗୀତ ଏବଂ ନାଟକ ଉପଭୋଗ କରିପାରିବେ ।
ଉଲ୍ଲେଖଯୋଗ୍ୟ, ୨୦୧୫ ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଜାପାନର ପୂର୍ବତନ ପ୍ରଧାନମନ୍ତ୍ରୀ ସିଞ୍ଜୋ ଆବେ କାଶୀ ଗସ୍ତରେ ଆସିବାବେଳେ ଏହାର ଭିତ୍ତିପ୍ରସ୍ତର ସ୍ଥାପନ କରାଯାଇଥିଲା। ଜାପାନର ଏକ କମ୍ପାନୀ ସହାୟତାରେ ଏହାର ନିର୍ମାଣ କାର୍ଯ୍ୟ କରାଯାଇଥିବାବେଳେ ଏହାକୁ ହାଇ-ଟେକ୍ କନଭେନସନ୍ ସେଣ୍ଟର କୁହାଯାଇପାରେ।