ଓଲିଉଡ୍ କମେଡିଆନ୍ ହରି ଦର୍ଶକଙ୍କୁ ହସେଇ ହସେଇ ବେଦମ୍ କରିଦେବେ। ହଁ, କେବଳ ହସେଇବେ କହିଲେ ଢେର୍ ହେବନି। ଫିଲ୍ମର କଥାବସ୍ତୁରେ ସେ ଏକ ନିଆରା ତଥା ଗୁରୁତ୍ୱପୂର୍ଣ୍ଣ ଚରିତ୍ର ନିର୍ବାହ କରୁଥିବା ଦେଖିବାକୁ ମିଳିବେ। ଅନ୍ୟ ଅନେକ ସିନେମା ଭଳି ଏ ଫିଲ୍ମରେ ତାଙ୍କ ଚରିତ୍ରଟି ଅଳ୍ପ ସମୟର ନୁହେଁ କିମ୍ବା କେବଳ ହାସ୍ୟରସ ଭିତରେ ଅଦୌ ସୀମିତ ନୁହେଁ। ତାଙ୍କୁ ସାଥ୍ ଦେବେ ଅନ୍ୟତମ ହାସ୍ୟାଭିନେତା ପ୍ରଜ୍ଞା। ଉଭୟେ ଏ ଫିଲ୍ମର କାହାଣୀରେ ନୂଆ ନୂଆ ଟ୍ୱିଷ୍ଟ ଆଣିବେ।
କାହାଣୀର ମୋଡ଼ ବଦଳେଇବେ ଆଉ ଦର୍ଶକଙ୍କ ଉତ୍କଣ୍ଠା ବଢ଼ାଇବେ। ନିର୍ମାଣ ଚାଲିଥିବା ଏ ଚଳଚ୍ଚିତ୍ରର ନାଁ ରଖାଯାଇଛି ‘ଜୋର୍ କା ଝଟକା’। ଫିଲ୍ମର କହାଣୀ ଏମିତି ଯେ, ଏଥିରେ ଜଣେ କେହି ମେଲ୍ ଲିଡ୍ ବା ମୁଖ୍ୟ ନାୟକ ନାହାନ୍ତି। କାହାଣୀ ଅନୁସାରେ, ସମସ୍ତ କଳାକାର ନିଜ ନିଜ ସ୍ଥାନରେ ଜଣେ ଜଣେ ହିରୋ।
ହରି ଓ ପ୍ରଜ୍ଞାଙ୍କୁ ବାଦ୍ ଦେଲେ ଅନ୍ୟ ଯେଉଁମାନେ ଏ ଫିଲ୍ମରେ ଦେଖିବାକୁ ମିଳବେ ସେମାନେ ହେଲେ ଦୀପକ, ପିଙ୍କି, ମିହିର ଦାସ, ଶ୍ରୀତମ, ପ୍ରଦ୍ୟୁମ୍ନ ଲେଙ୍କା, ତୃପ୍ତି ସିହ୍ନା, ପ୍ରତିଭା ପଣ୍ଡା, ଗୁଡୁ ଓ ଶଙ୍କର। ମୁଖ୍ୟତଃ ରୋମାଣ୍ଟିକ୍ କମେଡିକୁ ନେଇ ଏହାର କାହାଣୀ ଗତିଶୀଳ।
ଶିବାନୀ ଫିଲ୍ମସ୍ ବ୍ୟାନରରେ ପ୍ରସ୍ତୁତ ଏ ଫିଲ୍ମର ପ୍ରଯୋଜକ ଶିବାନୀ ବେହେରା ଓ ଅଶୋକ କୁମାର ବେହେରା। ଚିତ୍ରନାଟ୍ୟ ଲେଖିବା ସହ ନିର୍ଦ୍ଦେଶନା ଦେଇଛନ୍ତି ପିନୁ ନାୟକ। କାହାଣୀ ଲେଖିଛନ୍ତି ଶିବାନୀ ବେହେରା। ଡଃ ନିର୍ମଳ ନାୟକ ସଂଳାପ ଓ ଗୀତ ରଚନା କରିଛନ୍ତି। ଗୀତଗୁଡ଼ିକୁ ସଂଗୀତରେ ସଜାଇଛନ୍ତି ଅଭିଜିତ ମଜୁମଦାର। ବିଭିନ୍ନ ଗୀତରେ ହ୍ୟୁମାନ ସାଗର, ସତ୍ୟଜିତ, ତାରିକ ଅଜିଜ, ମଣ୍ଟୁ ଛୁରିଆ, ଆଶୁତୋଷ, ଲିପ୍ସା ମହାପାତ୍ର ପ୍ରମୁଖଙ୍କ କଣ୍ଠସ୍ୱର ଶୁଣିବାକୁ ମିଳିବ।
