କଟକ,ଏନ୍ଏନ୍ଏସ୍ : କଟକ ବାଦାମବାଡ଼ି ଥାନା ଅଂଚଳରେ ଜଣେ ୭ ବର୍ଷିୟ ନାବାଳିକାଙ୍କୁ ଦୁଷ୍କର୍ମ ଉଦ୍ୟମ ହୋଇଥିବା ନେଇ ଅଭିଯୋଗ ହୋଇଛି । ପୋଲିସ ଏ ସଂକ୍ରାନ୍ତରେ ଏକ ମାମଲା ରୁଜ୍ଜୁ କରିବା ସହ ଅଭିଯୁକ୍ତ ନାବାଳକକୁ ଥାନାରେ ଅଟକ ରଖି ପଚରା ଉଚୁରା ଚଳାଇଛି ।
ନାବାଳିକାଙ୍କ ପରିବାର ଏକ ବଞ୍ଜାରା ଶ୍ରେଣୀର । ଏମାନେ ଭିକ୍ଷା ବୃତି କରି ନିଜର ଗୁଜୁରାଣ ମେଂଟାଇବା ସହ ଖାନନଗର ନିକଟ ବସ୍ତିରେ ରହି ଆସୁଥିଲେ । ଅଭିଯୁକ୍ତ ମଧ୍ୟ ସେହି ଅଂଚଳର । ତେବେ ଆଜି ଅପରାହ୍ନରେ ନାବାଳିକାଙ୍କୁ ନିକଟସ୍ଥ ସାଇମନ୍ଦିରକୁ ବୁଲାଇ ଆଣିଥିଲା ଅଭିଯୁକ୍ତ । ନିକଟରେ ଥିବା ଏକ ଲାଇବ୍ରେରୀ ବନ୍ଦ ଥିବା ବେଳେ ଏହାର ସୁଯୋଗ ନେଇ ଅଭିଯୁକ୍ତ ନାବାଳକ ଏହାର ସିଡ଼ି ଘର ତଳେ ନାବାଳିକାଙ୍କୁ ଦୁଷ୍କର୍ମ ଉଦ୍ୟମ କରିଥିଲା ।
ତେବେ ନାବାଳିକା ଜଣକ ପାଟି କରିବାରୁ ତାଙ୍କ ଚିକ୍ରାର ଶୁଣି ନିକଟରେ ଉପସ୍ଥିତ କିଛି ଲୋକ ଘଟଣାସ୍ଥଳରେ ପହଂଚି ଅଭିଯୁକ୍ତ ନାବାଳକକୁ ଧରି ପୋଲିସ ଜିମା ଦେଇଥିଲେ । ବାଦାମବାଡ଼ି ପୋଲିସ ଅଭିଯୁକ୍ତକୁ ଥାନାରେ ଅଟକ ରଖି ପଚରା ଉଚୁରା ଜାରୀ ରଖିଛି । ଶେଷ ଖବର ସୁଦ୍ଧା ଥାନା ପକ୍ଷରୁ ଏ ସଂକ୍ରାନ୍ତରେ ୨୬୮/୧୯ ରେ ଦଫା ୩୬୩/୩୭୬ ଶିଶୁ ଯୌନ ନିରୋଧ ଆଇନ ବଳରେ ଏକ ମାମଲା ରୁଜ୍ଜୁ କରି ପୋଲିସ ତଦନ୍ତ ଜାରୀ ରଖିଛି ।
