ମୁମ୍ବାଇ,ଏଜେନ୍ସି: ଭାରତୀୟ କ୍ରିକେଟର ଅନ୍ୟତମ ମହାନ ଖେଳାଳିଭାବେ ଜଣାଣୁଣା ରାହୁଲ ଦ୍ରାବିଡ଼ ଭାରତୀୟ କ୍ରିକେଟ ଦଳର ନୂଆ ମୁଖ୍ୟ କୋଚ୍ ବା ପ୍ରଶିକ୍ଷକ ନିଯୁକ୍ତ ହୋଇଛନ୍ତି। ଆସନ୍ତା ନ୍ୟୁଜିଲାଣ୍ଡ ସିରିଜରୁ ସେ ଦାୟିତ୍ବ ଗ୍ରହଣ କରିବେ। ଏ ସମ୍ପର୍କରେ ବିସିସିଆଇ ପକ୍ଷରୁ ଆଜି ଘୋଷଣା କରାଯାଇଛି।
ବିସିସିଆଇର କ୍ରିକେଟ ପରାମର୍ଶଦାତା କମିଟି ସର୍ବସମ୍ମତିକ୍ରମେ ଦ୍ରାବିଡ଼ଙ୍କ ନାଁରେ ମୋହର ମାରିଛି। ଭାରତୀୟ ଟିମର କୋଚ ହେବା ସମ୍ମାନର ବିଷୟ ବୋଲି ରାହୁଲ କହିଛନ୍ତି। ବିସିସିଆଇ ଅଧ୍ୟକ୍ଷ ସୌରଭ ଗାଙ୍ଗୁଲି ଦ୍ରାବିଡ଼ଙ୍କ ନିଯୁକ୍ତିକୁ ସ୍ବାଗତ କରିଛନ୍ତି। ରାହୁଲଙ୍କର ଏକ ଉଲ୍ଲେଖନୀୟ କ୍ୟାରିୟର ରହିଛି ଓ ସେ ଜଣେ ମହାନ ଖେଳାଳି ବୋଲି ଗାଙ୍ଗୁଲି କହିଛନ୍ତି। ଟିମ ଇଣ୍ଡିଆର ନୂଆ କୋଚ ପାଇଁ ବିସିସିଆଇ ଅକ୍ଟୋବର ୨୬ରେ ଆବେଦନ ଆହ୍ବାନ କରିଥିଲା।
ବର୍ତ୍ତମାନର ମୁଖ୍ୟ କୋଚ ରବି ଶାସ୍ତ୍ରୀଙ୍କ କାର୍ଯ୍ୟକାଳ ଆସନ୍ତା ନଭେମ୍ବର ମାସରେ ଶେଷ ହେବ। ତେବେ ଭାରତୀୟ ଦଳର ଅଧିନାୟକ ବିରାଟ କୋହଲିଙ୍କ ସହିତ ଦ୍ରାଭିଡଙ୍କ କିପରି ସମ୍ପର୍କ ରହିବ ତାହା ଉପରେ ସମସ୍ତଙ୍କ ନଜର ରହିବ।
