ନୂଆଦିଲ୍ଲୀ,ଏଜେନ୍ସି: ଆଜିଠୁ ନବରାତ୍ର ଆରମ୍ଭ ହେଉଥିବା ବେଳେ ଦେଶର ସବୁ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳକୁ ଅକ୍ସିଜେନ ପ୍ଲାଣ୍ଟ ଉପହାର ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ଏନେଇ ପ୍ରଧାନମନ୍ତ୍ରୀ ମୋଦୀ ଉତ୍ତରାଖଣ୍ଡର ରିଷିକେଶ ପହଞ୍ଚି ଏହି ପ୍ଲାଣ୍ଟର ଉଦଘାଟନ କରିଛନ୍ତି। ରିଷିକେଶ ଏମ୍ସରୁ ୩୫ଟି ପିଏସଏ ପ୍ଲାଣ୍ଟକୁ ଭର୍ଚ୍ଚୁଆଲ ମୋଡରେ ଶୁଭାରମ୍ଭ କରିଛନ୍ତି। ଏହା ପରେ ସେଠାରେ ମୋଦୀ ଏକ ଜନସଭାକୁ ସମ୍ବୋଧିତ କରିଛନ୍ତି।
ପ୍ରଧାନମନ୍ତ୍ରୀ ମୋଦୀ କହିଛନ୍ତି କି, ଆଜିଠୁ ନବରାତ୍ର ପର୍ବ ଆରମ୍ଭ ହେଉଛି। ଆଜିର ଦିନରେ ମା ଶୈଲପୁତ୍ରିଙ୍କର ପୂଜା ହୋଇଥାଏ। ଏହି ଅବସରରେ ଏଠାରେ ମୋର ଉପସ୍ଥିତି ହେବା ଓ ହିମାଳୟର ମାଟିକୁ ପ୍ରଣାମ କରିବା ମୋ ଜୀବନର ବହୁତ ବଡ଼ ମୁହୂର୍ତ୍ତ। ୨୦ ବର୍ଷର ମୋର ଅଖଣ୍ଡ ଯାତ୍ରା ଆଜି ୨୧ ବର୍ଷରେ ପ୍ରବେଶ କରୁଛି ଓ ଏହି ଅବସରରେ ମୋର ଏଠାକୁ ଆସିବା ମୋ ପାଇଁ ବହୁତ ବଡ଼ ସୌଭାଗ୍ୟ ବୋଲି କହିଛନ୍ତି। ଏଥିସହିତ କରୋନା ବିରୋଧରେ ଭାରତର ମୁକାବିଲା ଏବେ ସାରା ବିଶ୍ୱରେ ଚର୍ଚ୍ଚାର ବିଷୟ ପାଲଟିଛି ବୋଲି ମୋଦୀ କହିଛନ୍ତି।
