ଭୁବନେଶ୍ୱର,ଏନ୍ଏନ୍ଏସ: କରୋନାରୁ ସୁସ୍ଥହୋଇ ସ୍ୱେଚ୍ଛାକୃତ ଭାବେ ପ୍ଲାଜମା ଦାନ କରିଥିବା କାକଟପୁର ନିର୍ବାଚନମଣ୍ଡଳୀ ଅନ୍ତର୍ଗତ ଜଣେ ଯୁବକଙ୍କୁ ସୂଚନା ପ୍ରଯୁକ୍ତିବିଦ୍ୟା ଓ କ୍ରୀଡ଼ା ମନ୍ତ୍ରୀ ତୁଷାରକାନ୍ତି ବେହେରା ସମ୍ବର୍ଦ୍ଧିତ କରିଛନ୍ତି। ପ୍ରକାଶ ଯେ, ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ କ୍ରମେ ପୁରୀ ଜିଲ୍ଲାରେ ଅର୍ଥ ଓ ଅବକାରୀ ମନ୍ତ୍ରୀ ନିରଞ୍ଜନ ପୂଜାରୀ ଏବଂ ସ୍ଥାନୀୟ ବିଧାୟକଙ୍କ ସହଯୋଗରେ ପ୍ଲାଜମା ଦାନ ଓ ଏହାର ମହତ ଉଦ୍ଦେଶ୍ୟ ସମ୍ପର୍କରେ ବ୍ୟାପକ ଜନସଚେତନତା କାର୍ଯ୍ୟକ୍ରମ ଚାଲୁରହିଛି। ଏହି ଅବସରରେ ମନ୍ତ୍ରୀ ତୁଷାରକାନ୍ତି ବେହେରାଙ୍କ କାକଟପୁର ନିର୍ବାଚନମଣ୍ଡଳୀରୁ ଚାରି ଜଣ ପ୍ଲାଜମା ଦାନ ପାଇଁ ଇଚ୍ଛା ପ୍ରକଟ କରିଥିଲେ। ଆଜି ସକାଳେ ଏହି ଚାରିଜଣ ନିଜର ପ୍ଲାଜମା ପାଇଁ କଟକ ବଡ ମେଡିକାଲରେ ପହଞ୍ଚି ଥିଲେ। ଏଥିରୁ ପ୍ଲାଜମା ଦାନ ଲାଗି ଜଣେ ଯୁବକ ଯୋଗ୍ୟ ବିବେଚିତ ହୋଇ ନିଜର ପ୍ଲାଜମା ଦାନ କରିଥିଲେ। ମନ୍ତ୍ରୀ ଶ୍ରୀ ବେହେରା ଏହି ଯୁବକଙ୍କୁ ସମ୍ବର୍ଦ୍ଧିତ କରିବା ସହ ତାଙ୍କ ଏହି ଉଦ୍ୟମ ଆଗାମୀ ଦିନରେ ଅନ୍ୟମାନଙ୍କୁ ପ୍ଲାଜାମା ଦାନ ପାଇଁ ଅନୁପ୍ରେରିତ କରିବ ବୋଲି କହିଥିଲେ।
