ଫିରିଙ୍ଗିଆ,ଏନ୍ଏନ୍ଏସ୍: କନ୍ଧମାଳ ଜିଲ୍ଲା ନୂଆପଦର ପଞ୍ଚାୟତ ରବିଙ୍ଗିଆ ଗାଁର ସୂନ୍ଦୁ ରୁମି ଜଙ୍ଗଲ ନିକଟ ରାସ୍ତାରେ ଚଢ଼ଉ କରି ଫିରିଙ୍ଗିଆ ପୁଲିସ ୧,୫୪୮କେଜି ଗଞ୍ଜେଇ ଜବତ କରିଛି । ମିଳିଥିବା ରିପୋର୍ଟ ମୁତାବକ, ଗଞ୍ଜେଇ ଚାଲାଣ ହେଉଥିବା ନେଇ କୌଣସି ସୂତ୍ରରୁ ଖବର ପାଇ ଫିରିଙ୍ଗିଆ ଥାନାଧିକାରୀ ତପନ କୁମାର ନାହାକଙ୍କ ନେତୃତ୍ୱରେ ଏକ ଟିମ୍ ଚଢ଼ଉ କରିଥିଲା । ଘଟଣାସ୍ଥଳରେ ପୁଲିସକୁ ଦେଖି ଚାଲାଣକାରୀ ଗଞ୍ଜେଇ ଛାଡ଼ି ଫେରାର ହୋଇଯାଇଥିବାବେଳେ ଗଞ୍ଜେଇ ଜବତ କରିଥିବା ନେଇ ପୁଲିସ ସୂଚନା ଦେଇଛି । ଏନେଇ ଫିରିଙ୍ଗିଆ ଥାନାରେ ମାମଲା ରୁଜୁ କରିଥିବାବେଳେ ଫେରାର ଅଭିଯୁକ୍ତ ଫିରିଙ୍ଗିଆ ଥାନା ଅଞ୍ଚଳ ବେଙ୍ଗେଶି ପଦର ଏବଂ ଜାରା ପଙ୍ଗା ଅଞ୍ଚଳର ବୋଲି ଜଣାପଡ଼ିଛି । ଅଭିଯୁକ୍ତକୁ ଧରିବା ପାଇଁ ପ୍ରୟାସ ଜାରି ରହିବା ସହ ଅଧିକ ତଦନ୍ତ ଚାଲୁ ରହିଥିବା ନେଇ ଫିରିଙ୍ଗିଆ ଥାନାଧିକାରୀ ତପନ କୁମାର ନାହାକ ସୂଚନା ଦେଇଛନ୍ତି ।
