ଫିରିଙ୍ଗିଆ, ଫୁଲବାଣୀ,ଏନ୍ଏନ୍ଏସ୍: ବହୁଚର୍ଚ୍ଚିତ ଫିରିଙ୍ଗିଆ ବ୍ଲକ ଉପାଧ୍ୟାକ୍ଷ ଅଜିତ ସାହୁ ନିଖୋଜ ଘଟଣା ଉପରୁ ଫିରିଙ୍ଗିଆ ପୁଲିସ ପରଦା ଉଠାଇଛି । ଗତକାଲି ସଦର ଏସଡିପିଓ ସୁପ୍ରସନ ମଲିକ ଓ ଫିରିଙ୍ଗିଆ ଥାନାଧିକାରୀ ତପନ କୁମାର ନାହାକ ସାମ୍ବାଦିକ ସମ୍ମିଳନୀ କରିଥିବାବେଳେ ନିଜେ ବ୍ଲକ ଉପାଧ୍ୟାକ୍ଷ ଅଜିତ ସାହୁ ଏହି ଘଟଣା ମୋର ନିଜ ସୁପରିକଳ୍ପିତ ବୋଲି କହିବା ପରେ ପ୍ରକୃତ ସତ ସାମ୍ନାକୁ ଆସିଛି । ତେବେ ଏହି ଘଟଣାରେ ଫିରିଙ୍ଗିଆ ପୁଲିସ ଏହି ନାଟକର ପ୍ରକୃତ ରହସ୍ୟକୁ ବାହାର କରିଛି । ସରକାରୀ କର୍ମଚାରୀଙ୍କୁ ଭୁଲ ସୂଚନା ଦେବାସହ ହଇରାଣ କରିବା, ଜଣକ ବିରୁଦ୍ଧରେ ଆକ୍ସନ ନେବାକୁ ପ୍ରବର୍ତ୍ତାଇବା, ଲୋକଙ୍କ ମଧ୍ୟରେ ଭୟ ସୃଷ୍ଟି କରିବା ଭଳି ସଙ୍ଗୀନ ଅଭିଯୋଗରେ ଏକ ମାମଲା ରୁଜୁ କରିଛି । ଏହାସହ ଫିରିଙ୍ଗିଆ ବ୍ଲକ ଉପାଧ୍ୟକ୍ଷ ଅଜିତ ସାହୁ, ରତଙ୍ଗ ସମିତି ସଭ୍ୟ ବିରଞ୍ଚି ମଲିକ ଓ ରତଙ୍ଗ ମେଟ ବସନ୍ତ ମଲିକଙ୍କ ସମେତ ତାଙ୍କୁ ଏହି ଘଟଣାରେ ସହଯୋଗ କରିଥିବା ପଡ଼ୋଶୀ ବୌଦ୍ଧ ଜିଲ୍ଲାର ଯୁକ୍ତେଶ୍ୱର ରଣା, ତ୍ରିଲୋଚନ ଝଙ୍କାର ଓ ଅଜିତ ରାଣାକୁ ଗିରଫ କରିଛି । ଉକ୍ତ ଘଟଣାରେ ବ୍ୟବହୃତ ଟାଟା ଟିଆଗୋ କାର ଓ ୨ଟି ବାଇକକୁ ଜବତ କରିଥିବାବେଳେ ଆଜି ସମସ୍ତ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି ।
