ଦୁଇ ଥର ଉଦ୍ଘାଟନ ପରେ ବି ଅସମ୍ପୂର୍ଣ୍ଣ ପାଟ ଘର; ୧.୨୧ କୋଟିରେ ନିର୍ମିତ, ମାସକରେ ଉତ୍ପାଦ ୩ ଶାଢ଼ୀ
ବ୍ରହ୍ମପୁର,ଏନ୍ଏନ୍ଏସ୍: ବହୁ ପୁରାତନ ଐତିହ୍ୟ ସମ୍ପନ୍ନ ବ୍ରହ୍ମପୁରୀ ପାଟର ସ୍ଥିତିକୁ ବଞ୍ଚାଇ ରଖିବା ସହ ଶତାଧିକ ପାଟ ବୁଣାକାରଙ୍କୁ ଥଇଥାନ ଲକ୍ଷ୍ୟରେ କେନ୍ଦ୍ର, ରାଜ୍ୟ ସରକାରଙ୍କ ପକ୍ଷରୁ ସ୍ଥାପିତ ‘ପାଟଘର’ ଲକ୍ଷ୍ୟଭ୍ରଷ୍ଟ ହୋଇଥିବା ପରିଲକ୍ଷିତ ହୋଇଛି। ପ୍ରାୟ ଏକ କୋଟି ୨୧ ଲକ୍ଷ ଟଙ୍କା ବିନିମୟରେ ‘ସ୍ଫୁତ୍ତି’ର ଯୋଜନାରେ ନିର୍ମିିତ ଏହି ଅନୁଷ୍ଠାନଟି ଦୁଇ ଥର ଉଦ୍ଘାଟନ ହୋଇଛି। ତଥାପି ଅସମ୍ପୂର୍ଣ୍ଣ ସ୍ଥିତିରେ ରହିଛି। ଏଯାବତ୍ ଅନୁଷ୍ଠାନଟିକୁ ସ୍ଥାୟୀ ଭାବେ ବିଦ୍ୟୁତ୍ ଯୋଗାଣ ହୋଇନି। ଫଳରେ ବାରମ୍ବାର ବିଦ୍ୟୁତ୍ ସଂଯୋଗ ବିଛିନ୍ନ ହେଉଛି। ବୁଣା କାର୍ଯ୍ୟରେ ବିଘ୍ନ ସୃଷ୍ଟି ହେଉଛି। ଫଳରେ ମାସକ ମଧ୍ୟରେ ମାତ୍ର ୩ଟି ଶାଢ଼ୀ ବୁଣାଯାଇଥିବା ସୂଚନା ମିଳିଛି।
ସୂଚନା ଯୋଗ୍ୟ ଯେ ଗତ ମାସ ୧୧ରେ ଏହି “ପାଟଘର’କୁ ବ୍ରହ୍ମପୁର ସାଂସଦ, ବିଧାୟକ, ବିଏମ୍ସି ମେୟର, ଗଞ୍ଜାମ ଜିଲ୍ଳାପାଳ, ବିଏମ୍ସି କମିଶନର, ବ୍ରହ୍ମପୁର ଉପ ଜିଲ୍ଳାପାଳଙ୍କ ସମେତ କେନ୍ଦ୍ର ସରକାରଙ୍କ ଏମ୍ଏସ୍ଏମ୍ଇ ବିଭାଗର ଅଧିକାରୀଙ୍କ ଉପସ୍ଥିତିରେ ଶୁଭାରମ୍ଭ କରାଯାଇଥିଲା। କିନ୍ତୁ ଆଭାସୀ ମୋଡ୍ରେ ରାଜ୍ୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହାକୁ ୨୦୨୧ ମସିହା ଡିସେମ୍ବର ୧୨ରେ ଉଦ୍ଘାଟନ କରିସାରିଛନ୍ତି। ଏତେ ପର୍ବ ପାଳିତ ହେବା ପରେ ବି ପ୍ରଶାସନର ଖାମଖିଆଲି ନୀତି ଯୋଗୁଁ ଏଯାବତ୍ ଏହା ସମ୍ପୂର୍ଣ୍ଣ ଭାବେ କାର୍ଯ୍ୟକ୍ଷମ ହୋଇପାରିନାହିଁ। ଏଠାରେ ୧୦ଟି ଏସ୍ଏଚ୍ଜି ମହିଳା ଗ୍ରୁପର ଶତାଧିକ ମହିଳା ପାଟ ବୁଣି ଆର୍ଥିକ ଭାବେ ଥଇଥାନ ହେବେ ବୋଲି କୁହାଯାଇଥିଲା। କିନ୍ତୁ ଏଯାବତ୍ ଏଠାରେ ଆନୁସଙ୍ଗିକ ବ୍ୟବସ୍ଥା ହୋଇପାରିନଥିବାରୁ ସମ୍ପ୍ରତି ଏଠାରେ ଦୁଇ ଜଣ ମହିଳା ବୁଣକାର କାର୍ଯ୍ୟ କରୁଥିବା ବେଳେ ଜଣେ ଡିଜାଇନର କାର୍ଯ୍ୟର ପର୍ଯ୍ୟବେକ୍ଷଣ କରୁଛନ୍ତି।
