ନୂଆଦିଲ୍ଲୀ: ମୁମ୍ବାଇର ପୂର୍ବତନ ପୁଲିସ କମିଶନର ପରମବୀର ସିଂହ ଆଜି ମୁମ୍ବାଇର କାନ୍ଦିବାଲୀ କ୍ରାଇମବ୍ରାଞ୍ଚ ଅଫିସରେ ହାଜର ହୋଇଛନ୍ତି। ପରମବୀର ଦୀର୍ଘ ୭ ମାସ ପରେ ମୁମ୍ବାଇରେ ପହଂଚିଛନ୍ତି। କୋର୍ଟ ସମ୍ପତ୍ତି ଜବତର ଆଦେଶ ଦେବା ପରେ ପରମବୀର ହାଜର ହୋଇଥିବା ଜଣାପଡ଼ିଛି। ୨ ଦିନ ପୂର୍ବରୁ ମୁମ୍ବାଇ ପୁଲିସ କ୍ରାଇମବ୍ରାଞ୍ଚ ପରମବୀରଙ୍କ ୨ଟି ଘର କବାଟରେ ‘ଘୋଷିତ ଅପରାଧୀ’ର ନୋଟିସ ଲଗାଇଥିଲେ। ଏହି ନୋଟିସରେ ୩୦ଦିନ ମଧ୍ୟରେ ଯାଞ୍ଚ ଏଜେନ୍ସି କିମ୍ବା ଅଦାଲତ ସମ୍ମୁଖରେ ହାଜିର ହେବାକୁ କୁହାଯାଇଥିଲା।
ସୂଚନାଯୋଗ୍ୟ, ଏହାପୂର୍ବରୁ ପରମବୀର ସିଂହ ଦେଶ ଛାଡ଼ି ପଳାଇ ଯାଇଥିବା ଅ।ରୋପକୁ ତାଙ୍କ ଓକିଲ ଖଣ୍ଡନ କରିଥିଲେ। ପରମବୀର ଦେଶରେ ଥିଲେ କିନ୍ତୁ ଜୀବନ ବିପଦରେ ଥିବା ଯୋଗୁ ଲୁଚିଥିବା ସୁପ୍ରିମକୋର୍ଟ ସମ୍ମୁଖରେ ଓକିଲ କହିଥିଲେ। ପରମବୀର ୪୮ ଘଣ୍ଟା ମଧ୍ୟରେ ଯାଞ୍ଚରେ ସାମିଲ ହେବେ ବୋଲି ମଧ୍ୟ ତାଙ୍କ ଓକିଲ ଦାବି କରିଥିଲେ। ସୁପ୍ରିମକୋର୍ଟ ଏବେ ପରମବୀରଙ୍କ ଗିରଫ ଉପରେ ରୋକ ଲଗାଇଛନ୍ତି।
