ଅମୃତସର ସୀମାରୁ ମିଳିଲା ପାକ୍ ଡ୍ରୋନ୍

ଅମୃତସର: ପଞ୍ଜାବର ଭାରତ-ପାକିସ୍ତାନ ସୀମାରେ ଗତ କିଛିଦିନ ଧରି ଥମିଯାଇଥିବା ଡ୍ରୋନ୍ ଗତିବିଧି ପୁଣି ବଢ଼ିବାରେ ଲାଗିଛି । ଲଗାତାର ଦ୍ୱିତୀୟ ଦିନ ରବିବାର ଅମୃତସର ସୀମାରେ ଏକ ଡ୍ରୋନ୍ ଠାବ କରାଯାଇଛି । ସୁରକ୍ଷା କମିଟିର ସୂଚନା ଆଧାରରେ ଏହାକୁ ବିଏସ୍‌ଏଫ୍ ଜବତ କରିଛି । ବିଏସ୍‌ଏଫ୍ ଏବଂ ପଞ୍ଜାବ ପୁଲିସର ମିଳିତ ଟିମ୍ ଏହି ଡ୍ରୋନ୍‌କୁ ଅମୃତସର ସୀମାରେ ଥିବା କକ୍କଡ଼ ଗାଁରୁ ଜବତ କରାଯାଇଥିବା ବିଏସ୍‌ଏଫ୍ କହିଛି । ଡ୍ରୋନ୍‌କୁ ଯାଞ୍ଚ୍ ପାଇଁ ପଠାଯାଇଛି । ସେଠାରେ ଏହାର ମୁଭ୍‌ମେଣ୍ଟ୍ ସମ୍ପର୍କରେ ବିସ୍ତୃତି ସୂଚନା ହାସଲ କରାଯିବ । ଏହା ପୂର୍ବରୁ ତରନତାରନ୍‌ର ସୀମାନ୍ତ ଗାଁ ରାଜୋକେରୁ ଏକ ଡିଜେଆଇ ମାଟ୍ରିସ୍ ୩୦୦ ଆର୍‌ଟିକେ ଡ୍ରୋନ୍ ଜବତ କରାଯାଇଥିଲା । ଏହି ଡ୍ରୋନ୍ ମାଧ୍ୟମରେ ପାକିସ୍ତା ଡ୍ରଗ୍ସ ସ୍ମଗଲର୍ ଭାରତୀୟ ସୀମା ଭିତରକୁ ହିରୋଇନ୍ ପଠାଉଥିଲେ ।