ଗ୍ରାମାଞ୍ଚଳ ଲୋକଙ୍କୁ ସ୍ୱାବଲମ୍ବୀ କରିବା ଆମର ମୁଖ୍ୟ ଲକ୍ଷ୍ୟ
ଓଡ଼ିଶାରେ ୟୁଏସ୍ଏଫବିଏଲ୍ର ନୂତନ ଶାଖା ଉନ୍ମୋଚନ ଘୋଷଣା ଅବସରରେ ଏହାର ପରିଚାଳନା ନିର୍ଦ୍ଦେଶକ ତଥା ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଗୋବିନ୍ଦ ସିଂଙ୍କୁ ଭେଟିଥିଲେ ଆମ ପ୍ରତିନିଧି ଏସ୍ . ଶ୍ରୀକାନ୍ତ। ୟୁଏସ୍ଏଫବିଏଲ୍ର କାର୍ଯ୍ୟଶୈଳୀ ଏବଂ ଗ୍ରାହକ ସେବା କ୍ଷେତ୍ରରେ ରହିଥିବା ବ୍ୟାଙ୍କର ସ୍ୱତନ୍ତ୍ର ଆଭିମୁଖ୍ୟ ସମ୍ପର୍କରେ ତାଙ୍କ ସହ ହୋଇଥିବା ବିଶେଷ ଆଲୋଚନାର କିୟଦଂଶ……
ପ୍ର: ଓଡ଼ିଶାରେ ସେବା ଆରମ୍ଭ କରିବା ପୂର୍ବରୁ ବିଗତ କିଛି ବର୍ଷ ଧରି ୟୁଏସ୍ଏଫବିଏଲ୍ ଉତ୍ତରପ୍ରଦେଶ ଏବଂ ବିହାର ଭଳି ରାଜ୍ୟରେ କାର୍ଯ୍ୟ କରିଆସିଛି। ସେଠାରେ ବ୍ୟାଙ୍କର ଉତ୍କର୍ଷତା ଏବଂ ସଫଳତା ସମ୍ପର୍କରେ କ’ଣ କହିବେ?
ଉ: ଦେଖନ୍ତୁ, ଆମେ ଯେଉଁ ଲକ୍ଷ୍ୟ ଏବଂ ଆଦର୍ଶ ନେଇ ବ୍ୟାଙ୍କିଙ୍ଗ ସେବା ଆରମ୍ଭ କରିଥିଲୁ ତାହା ଆଜି ସଫଳତାର ଅନେକ ସୋପାନ ଅତିକ୍ରମ କରିଛି। ବିହାର ଏବଂ ଉତ୍ତରପ୍ରଦେଶରେ ଆମେ ଶତପ୍ରତିଶତ ସଫଳତା ହାସଲ କରିପାରିଛୁ। ଯେଉଁଥିପାଇଁ ଭାରତର ଅନ୍ୟ କେତେକ ରାଜ୍ୟ ସମେତ ଓଡ଼ିଶା ଭଳି ରାଜ୍ୟରେ ଆମର ସେବା ସଂପ୍ରସାରିତ କରିବାକୁ ସୁଯୋଗ ପାଇଛୁ।
ପ୍ର: ବ୍ୟାଙ୍କିଙ୍ଗ ସେବା କ୍ଷେତ୍ରରେ ୟୁଏସ୍ଏଫବିଏଲ୍ର ସ୍ୱତନ୍ତ୍ରତା କ’ଣ ରହିଛି ଏବଂ କେଉଁଥିପାଇଁ ଗ୍ରାହକମାନେ ଏହି ବ୍ୟାଙ୍କ ପାଇଁ ଆଗ୍ରହୀ ହେବେ ବୋଲି ଆପଣ ଅନୁଭବ କରୁଛନ୍ତି?
ଉ: ସାଧାରଣ ବ୍ୟାଙ୍କିଙ୍ଗ ସେବା ତୁଳନାରେ ଆମେ ଗ୍ରାହକମାନଙ୍କ ଚାହିଦାକୁ ସ୍ୱତନ୍ତ୍ର ଦୃଷ୍ଟିରେ ଦେଖିବା ଏବଂ ସେମାନଙ୍କ ଚାହିଦା ଅନୁଯାୟୀ ତାହାକୁ ପୂରଣ କରିବା ହିଁ ଆମର ସ୍ୱତନ୍ତ୍ରତା। ବିଶେଷକରି ଆମ ସେବା ପରିସର ମଧ୍ୟରେ ରହିଥିବା ଏକ ସବିଶେଷ ଶ୍ରେଣୀର ଗ୍ରାହକମାନଙ୍କୁ ଯଦି ଆମେ ଉପଯୁକ୍ତ ସେବା ଯୋଗାଇ ଦେଇ ସେମାନଙ୍କ ଚାହିଦା ପୂରଣ କରିବାକୁ ସକ୍ଷମ ହେବୁ , ତେବେ ଗ୍ରାହକମାନେ ଆମ ପ୍ରତି ଆଗ୍ରହୀ ହେବେ ନାହିଁ କାହିଁକି?