ନୂଆଦିଲ୍ଲୀ,ଏଜେନ୍ସି: ଗୋଟିଏ ପଟେ ପେଟ୍ରୋଲ ଓ ଡିଜେଲ ଦର ବୃଦ୍ଧି ପାଉଥିବା ବେଳେ ୪ ରାଜ୍ୟରେ ତୈଳ ଦର ଶସ୍ତା ହୋଇଛି। ତୈଳଦର ହ୍ରାସ କରିବା ପାଇଁ ୪ ରାଜ୍ୟର ସରକାର ଏହା ଉପରେ ଲାଗୁଥିବା ଟିକସକୁ ହ୍ରାସ କରିଛନ୍ତି। ଫଳରେ ଗ୍ରାହକଙ୍କୁ କିଛି ମାତ୍ରାରେ ଆଶ୍ୱସ୍ତି ମିଳିଛି।
ରବିବାର ନିର୍ବାଚନ ପାଇଁ ପ୍ରସ୍ତୁତ ହେଉଥିବା ପଶ୍ଚିମବଙ୍ଗ ସରକାର ପେଟ୍ରୋଲ ଓ ଡିଜେଲ ଉପରେ ଲାଗୁ ହେଉଥିବା ଭ୍ୟାଟ ୧ ଟଙ୍କା ଲେଖାଏ ହ୍ରାସ କରିଛନ୍ତି। ଏହା ପୂର୍ବରୁ ଦେଶର ପ୍ରଥମ ରାଜ୍ୟଭାବେ ରାଜସ୍ଥାନ ସରକାର ଜାନୁଆରୀ ୨୯ରେ ତୈଳଦର ଉପରେ ଲାଗୁ ହେଉଥିବା ଭ୍ୟାଟ୍କୁ ୩୮%ରୁ ୩୬% ପ୍ରତିଶତ ହ୍ରାସ କରିଥିଲେ। ଆସାମ ମଧ୍ୟ କିଛି ଦିନ ତଳେ ତୈଳଦର ଉପରେ ଲାଗୁଥିବା ଅତିରିକ୍ତ ୫ ଟଙ୍କାର ଟିକସକୁ ପ୍ରତ୍ୟାହାର କରିଥିଲା। ଗତବର୍ଷ କରୋନା ମହାମାରୀ ଯୋଗୁଁ ଆସାମ ସରକାର ତୈଳଦର ଉପରେ ଏହି ଅତିରକ୍ତ ୫ ଟଙ୍କାର ଟିକସ ଲାଗୁ କରିଥିଲେ।
ମେଘାଳୟ ସରକାର ସବୁଠାରୁ ବଡ଼ ଘୋଷଣା କରିଥିଲେ। ପେଟ୍ରୋଲ ଉପରେ ୭.୪୦ ଟଙ୍କା ଓ ଡିଜେଲ ଉପରେ ୭.୧୦ ଟଙ୍କା ଛାଡ଼ କରିଥିଲେ। ମେଘାଳୟ ସରକାର ପେଟ୍ରୋଲ ଉପରେ ଲାଗୁ ହେଉଥିବା ୩୧.୬୨% ଭ୍ୟାଟକୁ ୨୦% ଓ ଡିଜେଲ ଉପରେ ଲାଗୁ ହେଉଥିବା ଭ୍ୟାଟକୁ ୨୨.୯୫%ରୁ ୧୨% କରି ଲୋକଙ୍କୁ ମହଙ୍ଗା ମାଡ଼ରୁ ସାମାନ୍ୟ ଉଦ୍ଧାର କରିଥିଲେ।
ଅନ୍ୟପକ୍ଷରେ କେନ୍ଦ୍ର ସରକାର ତୈଳଦର ଉପରେ ଲାଗୁ ହେଉଥିବା ସୀମା ଶୁଳ୍କକୁ ହ୍ରାସ କରିବାକୁ ମନା କରିଦେଇଛନ୍ତି।
