ନୂଆଦିଲ୍ଲୀ, ଏଜେନ୍ସି: ସର୍ବସାଧାରଣ ସ୍ଥାନରେ ପ୍ରତିବାଦକୁ ନାପସନ୍ଦ କରିଛନ୍ତି ସୁପ୍ରିମକୋର୍ଟ। ଦିଲ୍ଲୀରେ ଶାହିନ ବାଗରେ ନାଗରିକତା ସଂଶୋଧନ ଆଇନ (ସିଏଏ)କୁ ନେଇ କରାଯାଇଥିବା ବିରୋଧ ପ୍ରଦର୍ଶନ ଉପରେ ସୁପ୍ରିମକୋର୍ଟ ଆଜି ବଡ଼ ନିଷ୍ପତି ଶୁଣାଇଛନ୍ତି। କୌଣସି ବ୍ୟକ୍ତି ସମୂହ ସର୍ବସାଧାରଣ ସ୍ଥାନକୁ ବ୍ଲକ୍ କରିପାରିବେ ନାହିଁ ବୋଲି କହିଛନ୍ତି। ଶାହିନ ବାଗ ମାମଲାରେ ଦୁଇ ସଦସ୍ୟ ବିଶିଷ୍ଟ ସମିତି ଗଠନ କରାଯାଇ ରିପୋର୍ଟ ଦିଆଯାଇ ଥିଲା। ତଥାପି ବିରୋଧ ପ୍ରଦର୍ଶନ କ୍ରମାଗତ ଚାଲିଛି। ଏହା ଦ୍ୱାରା ସାଧାରଣଲୋକଙ୍କର ବହୁ କ୍ଷତି ହେଉଛି। ସର୍ବୋଚ୍ଚ ନ୍ୟାୟାଳୟ କହିଛନ୍ତି ସାଧାରଣ ରାସ୍ତାକୁ ଅନିଶ୍ଚିତ ସମୟ ପାଇଁ ରୋକି ହେବ ନାହିଁ। ଅଧିକାରୀଙ୍କୁ ଏଭଳି ରାସ୍ତା ଅବରୋଧକୁ ହଟାଇବା ଦରକାର। ବିରୋଧ ପ୍ରଦର୍ଶନର ଅଧିକାର କେବଳ ନିର୍ଦ୍ଦିଷ୍ଟ କ୍ଷେତ୍ରରେ ଦିଆଯାଇପାରିବ।
ସୂଚନା ଥାଉକି, ସିଏଏ ଓ ଏନଆରସିକୁ ନେଇ ଗତ ବର୍ଷ ଡିସେମ୍ବରରେ ଦିଲ୍ଲୀର ଶାହିନ ବାଗରେ ଜୋରଦାର ବିକ୍ଷୋଭ ପ୍ରଦର୍ଶନ କରାଯାଇ ଥିଲା। ଦିଲ୍ଲୀ-ନୋଏଡା ରାସ୍ତାରେ ଏ ବିରୋଧ ଚାଲିବା ଯୋଗୁ ମାସ ମାସ ଧରି ରାସ୍ତା ବନ୍ଦ କରିବାକୁ ପଡ଼ିଲା। ଯେଉଁଥିରେ ସାଧାରଣ ଜନତାଙ୍କୁ ହଇରାଣ ହେବାକୁ ପଡ଼ିଥିଲା।
