ମୁନିଗୁଡ଼ା,ଏନ୍ଏନ୍ଏସ୍: ରାୟଗଡ଼ା ଜିଲ୍ଲା ମୁନିଗୁଡ଼ା ବ୍ଲକ୍ ପ୍ରେସ କ୍ଲବ ତରଫରୁ ଜାତୀୟ ପ୍ରେସ ଦିବସ ସ୍ଥାନୀୟ ସୁଭଦ୍ରା-ଉଦ୍ଧବ ସୌଣ୍ଡିକ ମଙ୍ଗଳ ଭବନ ପରିସରରେ ଅନୁଷ୍ଠିତ ହୋଇଯାଇଛି । ପ୍ରେସ କ୍ଲବ ଉପସଭାପତି ମନୋରଞ୍ଜନ ଦଲାଇଙ୍କ ସଭାପତିତ୍ୱ ଓ ସମ୍ପାଦକ ନନ୍ଦକିଶୋର ପଟ୍ଟନାୟକଙ୍କ ସଂଯୋଜନାରେ ଆୟୋଜିତ ଏହି କାର୍ଯ୍ୟକ୍ରମରେ ଶିକ୍ଷାବିତ ରାମକୃଷ୍ଣ ପଣ୍ଡା ମୁଖ୍ୟଅତିଥି ଭାବେ ଯୋଗ ଦେଇଥିବାବେଳେ ମୁଖ୍ୟବକ୍ତା ଭାବେ ପ୍ରେସ କ୍ଲବର ମୁଖ୍ୟ ଉପଦେଷ୍ଟା ରାମଚନ୍ଦ୍ର ବେହେରା ଯୋଗଦେଇ ପ୍ରଭୁ ଶ୍ରୀଜଗନ୍ନାଥଙ୍କ ଫଟୋଚିତ୍ରରେ ମାଲ୍ୟାର୍ପଣ, ପ୍ରଦୀପ ପ୍ରଜ୍ୱଳନ ପୂର୍ବକ କାର୍ଯ୍ୟକ୍ରମର ଶୁଭାରମ୍ଭ କରିଥିଲେ । ଉପସଭାପତି ଶ୍ରୀଯୁକ୍ତ ଦଳାଇ ସଭାପତିତ୍ୱ ଅଭିଭାଷଣରେ ଗଣମାଧ୍ୟମ ପ୍ରତିନିଧିଙ୍କୁ ଅଭିନନ୍ଦନ ଜଣାଇବା ସହ ବିଶ୍ୱରେ ଗଣମାଧ୍ୟମର ଅଭ୍ୟୁଦୟ, ସ୍ୱାଧୀନତା କାଳରେ ଭାରତରେ ଏହାର ଉପଯୋଗ, ରାଜ୍ୟରେ କୁଜିବର ପତ୍ରିକା ଓ ଉତ୍କଳ ଦୀପିକାଠାରୁ ଅଦ୍ୟାବଧି ଗଣମାଧ୍ୟମର କ୍ରମବିକାଶ, ସାମ୍ବାଦିକଙ୍କ ଗୁରୁ ଦାୟିତ୍ୱ ଓ ସାମାଜିକ ଭୂମିକା ବିଷୟରେ ବୁଝାଇଥିଲେ । ସେହିପରି ଉପଦେଷ୍ଟା ଶ୍ରୀ ବେହେରା ସତ୍ୟ ଓ ତଥ୍ୟ ଉପରେ ଗୁରୁତ୍ୱ ଦେଇ ଗ୍ରାମାଞ୍ଚଳ ଲୋକଙ୍କ ସମସ୍ୟାକୁ ପ୍ରଶାସନ ନିକଟରେ ଉପସ୍ଥାପନ କରିପାରିଲେ ସାମ୍ବାଦିକତାର ଇତିହାସ ସୃଷ୍ଟି ହୋଇପାରିବ ବୋଲି କହିଥିଲେ । ମୁଖ୍ୟଅତିଥି ଶ୍ରୀ ପଣ୍ଡା ପ୍ରତିକୂଳ ପରିସ୍ଥିତି ମଧ୍ୟରେ ସାମ୍ବାଦିକଙ୍କ ସମ୍ବାଦ ସଂଗ୍ରହ ଓ ସାଧାରଣ ଲୋକଙ୍କ ସେବାରେ ନିଜକୁ ସମର୍ପିତ କରୁଥିବା ଭାବନାକୁ ସମ୍ମାନ ଜଣାଇଥିଲେ । ଏହି କାର୍ଯ୍ୟକ୍ରମରେ ହର୍ଷ ଟ୍ରଷ୍ଟର ଶତାଧିକ ସ୍ୱେଚ୍ଛାସେବୀ, କର୍ମକର୍ତ୍ତାଙ୍କ ସହିତ ବରିଷ୍ଠ ସାମ୍ବାଦିକ ପ୍ରମୋଦ ସାହୁକାର, ବିଜୟ ଉଲ୍ଲକା, ନରେଶ ପାତ୍ର, ସନାତନ ନାୟକ, ରାଜେଶ ସାହୁ, ପ୍ରସାଦ ସାହୁକାର, ଧନୁ କୁଶୁଲିଆ, ହାଡ଼ିବା ଗୌଡ଼, ସଞ୍ଜୟ ନାଗ, ଲାଡ଼ି ଶଙ୍କର, ଆନନ୍ଦ ଟାକ୍ରୀ ଓ ବାପି ସାହୁକାର ପ୍ରମୁଖ ସାମ୍ବାଦିକ ଉପସ୍ଥିତ ରହିଥିଲେ ।
