ଶାର୍ଜା,ଏଜେନ୍ସି: ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ର ୧୪ତମ ସଂସ୍କରଣର ୫୧ତମ ମ୍ୟାଚ୍ ମୁମ୍ବାଇ ଇଣ୍ଡିଆନ୍ସ (ଏମ୍ଆଇ) ଓ ରାଜସ୍ଥାନ ରୟାଲ୍ସ (ଆରଆର) ମଧ୍ୟରେ ଖେଳାଯାଇଛି। ଶାର୍ଜା ଷ୍ଟାଡିୟମରେ ଖେଳାଯାଇଥିବା ଏହି ମ୍ୟାଚ୍ରେ ରାଜସ୍ଥାନ ରୟାଲ୍ସକୁ ମୁମ୍ବାଇ ଇଣ୍ଡିଆନ୍ସ ୮ ୱିକେଟରେ ପରାସ୍ତ କରିଛି। ରାଜସ୍ଥାନ ପ୍ରଥମେ ବ୍ୟାଟିଂ କରି ୨୦ ଓଭରରେ ୯ଟି ୱିକେଟ ହରାଇ ୯୦ ରନ୍ କରିଥିଲା। ଫଳରେ ମୁମ୍ବାଇକୁ ଏହି ମ୍ୟାଚ ବିଜୟ ପାଇଁ ୯୧ ରନ୍ର ଲକ୍ଷ୍ୟ ମିଳିଥିଲା।
ଜବାବରେ ମୁମ୍ବାଇ ଟିମ ରାଜସ୍ଥାନ ପକ୍ଷରୁ ଦିଆଯାଇଥିବା ଲକ୍ଷ୍ୟକୁ ୮.୨ ଓଭରରେ ହାସଲ କରିଥିଲା। ମୁମ୍ବାଇ ମାତ୍ର ୨ଟି ୱିକେଟ ହରାଇ ରାଜସ୍ଥାନକୁ ବଡ଼ ବ୍ୟବଧାନରେ ପରାସ୍ତ କରିଥିଲା। ଅଧିନାୟକ ରୋହିତ ଶର୍ମା ୨୨ ରନ୍ ସଂଗ୍ରହ କରିଥିବା ବେଳେ, ମ୍ୟାଚର ହିରୋ ପାଲଟିଥିଲେ ଯୁବ କ୍ରିକେଟର ଇଶାନ କିଷାନ। ସେ ୨୫ଟି ବଲ ଖେଳି ୫ଟି ଚୌକା ଓ ୩ଟି ଛକା ବଳରେ ଅପରାଜିତ ୫୦ ରନ୍ କରିଥିଲେ। ସୂର୍ଯ୍ୟକୁମାର ଯାଦବ ୧୩ ରନ୍ ଓ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ୫ ରନ୍ ଦଳ ପାଇଁ ବ୍ୟକ୍ତିଗତ ଯୋଗଦାନ ଦେଇଥିଲେ।
