ଦେଓଗାଁ,ଏନ୍ଏନ୍ଏସ୍: ପାଟଣାଗଡ଼ ଫରେଷ୍ଟ ରେଞ୍ଜ ଅଧୀନରେ ଥିବା ଦେଓଗାଁ ବ୍ଲକ୍ର ବନ୍ଧପଡା ଫରେଷ୍ଟ ସେକ୍ସନର ଦେଷଣ୍ଡ ଗାଁ’ରେ ବନ ବିଭାଗ ଚଢ଼ଉ କରି ବିପୁଳ ପରିମାଣରେ ଥିବା ଲକ୍ଷାଧିକ ଟଙ୍କାର କାଠକୁ ଜବତ କରିଛି। ମଙ୍ଗଳବାର ଦିନ ପାଟଣାଗଡ ରେଞ୍ଜର କର୍ମଚାରୀ ଓ ଫରେଷ୍ଟ ମୋବାଇଲ ସକ୍ୟୁଆଡ଼ର ମିଳିତ ଭାବରେ ଚଢ଼ଉ କରିଥିଲେ ଦ୍ୱେଷଣ୍ଡ ସ୍ଥିତ ସଂରକ୍ଷିତ ଜଙ୍ଗଲରେ।
ବନ ବିଭାଗର କାର୍ଯ୍ୟାନୁଷ୍ଠାନକୁ ଦେଖି ମାଫିଆ ମାନେ ଛତ୍ର ଭଙ୍ଗ ଦେଇଥିବା ବେଳେ ସେଠାରୁ କାଠଗଣ୍ଡି ଗୁଡିକୁ ଜବତ କରିଛି ବନ ବିଭାଗ। ଯେଉଁଥିରେ ୭ ଖଣ୍ଡ ବିଜା ଗଣ୍ଡି ସହ ସାହାଜ, ଧଉରା ଏବଂ ୩ ଟ୍ରାକ୍ଟର ଜାଳେଣି କାଠ ରହିଛି। ଏହା ସହ କାଠ କଟାରେ ବ୍ୟବହାର ହେବାକୁଥିବା ଜିନିଷପତ୍ର ମଧ୍ୟ ଜବତ କରି ପାଟଣାଗଡ଼ ରେଞ୍ଜ ଅଫିସ୍କୁ ନେଇଥିବା ଜଣାପଡିଛି। ଆଜିର ଏହି ଚଢ଼ଉରେ ଫରେଷ୍ଟର ସୁନୀଲ ମିଶ୍ର, ଅଶୋକ ନାୟକ, ସୁଧୀର ଜେନା, ଚନ୍ଦନ ସାହୁ ସହ ଫରେଷ୍ଟଗାର୍ଡ ମାନେ ସାମିଲ ଥିଲେ।
