ଯନ୍ତରମନ୍ତରରେ ‘କିଷାନ ସଂସଦ’ କରିବେ ଚାଷୀ
- ନୂଆଦିଲ୍ଲୀ: କୃଷି ଆଇନ ବିରୋଧରେ ଚାଷୀମାନେ ଦିଲ୍ଲୀର ଯନ୍ତରମନ୍ତରରେ ‘କିଷାନ ସଂସଦ’ ବା ବିକ୍ଷୋଭ ପ୍ରଦର୍ଶନ କରିବେ। ଏଥିପାଇଁ ଆଜି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱ୍ୱାଲ ଅନୁମତି ଦେଇଛନ୍ତି। ଆସନ୍ତାକାଲିଠାରୁ କୋଭିଡ ପ୍ରୋଟକଲ ଅନୁଯାୟୀ ଚାଷୀମାନେ ଯନ୍ତରମନ୍ତରରେ ବିକ୍ଷୋଭ କରିବେ।
ଦିଲ୍ଲୀ ପୁଲିସ୍ ମଧ୍ୟ ଚାଷୀଙ୍କ କିଷାନ ସଂସଦକୁ ଗ୍ରୀନ ସିଗନାଲ ଦେଇଛି। ଜାନୁଆରୀ ୨୬ରେ ଚାଷୀଙ୍କ ଟ୍ରାକ୍ଟର ରାଲିବେଳେ ଘଟିଥିବା ଘଟଣାର ଯେମିତି ପୁନରାବୃତ୍ତି ନ ହେବ, ସେଥିପାଇଁ ସବୁ ପ୍ରକାରର ବ୍ୟବସ୍ଥା ମଧ୍ୟ ପୁଲିସ୍ ପକ୍ଷରୁ କରାଯାଇଛି। ଚାଷୀମାନେ ଦିଲ୍ଲୀର ସିଙ୍ଘୁ ସୀମାରୁ ଦୈନିକ ୨୦୦ ଜଣିଆ ଗ୍ରୁପ୍ରେ ସଂସଦ ଅଭିମୁଖେ ଯିବାକୁ ଯୋଜନା କରିଛନ୍ତି। ଏହି ସମୟରେ ପୁଲିସ୍ ସେମାନଙ୍କୁ ଏସ୍କର୍ଟ ଯୋଗାଇଦେବ। ଚାଷୀଙ୍କୁ ଆନ୍ଦୋଳନ ପାଇଁ ଅନୁମତି ଦେବା ପାଇଁ ଦିଲ୍ଲୀ ସରକାର ଡିଡିଏମଇ ଆଇନ ଜରିଆରେ ଜାରି କରିଥିବା ନିର୍ଦ୍ଦେଶନାମାରେ କିଛି ପରିବର୍ତ୍ତନ କରିଛନ୍ତି। କାରଣ ଡିଡିଏମଇ ଆଇନରେ କୌଣସି ବିକ୍ଷୋଭ ଓ ଶୋଭାଯାତ୍ରାକୁ ପୂର୍ବରୁ ଅନୁମତି ମିଳୁ ନଥିଲା। କିନ୍ତୁ ଏବେ ଏଥିପାଇଁ ଅନୁମତି ମିଳିଛି।
ସୂଚନାଯୋଗ୍ୟ, ୨୦୨୦ ନଭେମ୍ବର ମାସରେ ସଂଯୁକ୍ତ କିଷାନ ମୋର୍ଚ୍ଚା ଗଠନ ହୋଇଥିଲା। ଏହି ଚାଷୀ ସଂଗଠନ ଅଧୀନରେ ହଜାର ହଜାର ଚାଷୀ କେନ୍ଦ୍ର ସରକାରଙ୍କ ୩ଟି କୃଷି ଆଇନ ବିରୋଧରେ ଦୀର୍ଘ ମାସ ହେଲାଣି ଦିଲ୍ଲୀ ସୀମାରେ ଆନ୍ଦୋଳନ କରୁଛନ୍ତି। ଏବେ ସଂସଦର ମୌସୁମୀ ଅଧିବେଶନ ଚାଲିଥିବାରୁ ନିଜର ଦାବିକୁ ଅଧିକ ଶାଣିତ କରିବା ପାଇଁ ସେମାନେ କିଷାନ ସଂସଦ ନାଁରେ ବିକ୍ଷୋଭ ସଭା କରିବାକୁ ଯୋଜନା କରିଛନ୍ତି।
ଏହା ଅଗଷ୍ଟ ୧୩ ଯାଏ ଚାଲିବ। କିଷାନ ସଂସଦ ପୂରାଦେଶର ସଂସଦରେ ହେଉଥିବା କାର୍ଯ୍ୟ ଭଳି ଚାଲିବ। କିଷାନ ସଂସଦରେ ଜଣେ ବାଚସ୍ପତି ଓ ଜଣେ ଉପବାଚସ୍ପତି ରହିବେ। ଚା’ ବିରତି ହେବ। ପୁଲିସ୍ ଯଦି ସେମାନଙ୍କୁ ଅଟକାଇବ, ତା’ହେଲେ ସେମାନେ ବିନା କୌଣସି ବାଧାରେ ନିଜକୁ ପୁଲିସ୍ ହାତରେ ଗିରଫ କରାଇବେ ବୋଲି ନିଷ୍ପତ୍ତି ନେଇଛନ୍ତି।