ମୁମ୍ବାଇ,ଏଜେନ୍ସି : ଈଶାନ ଖଟ୍ଟର ଓ ଅନନ୍ୟା ପାଣ୍ଡେ ଅଭିନୀତ ଫିଲ୍ମ ‘ଖାଲି-ପିଲି’ର ଟିଜର ରିଲିଜ ହୋଇଛି। ନିର୍ଦ୍ଦେଶକ ମକବୁଲ ଖାନଙ୍କ ଏହି ରୋମାଣ୍ଟିକ-ଆକସନ ଫିଲ୍ମରେ ଈଶାନ ଜଣେ ଟ୍ୟାକ୍ସି ଡ୍ରାଇଭର ଚରିତ୍ରରେ ଅଭିନୟ କରୁଥିବା ଦେଖିବାକୁ ମିଳିଛି। ଅନନ୍ୟା ଯେତେବେଳେ ଅଧରାତିରେ ଈଶାନଙ୍କ ଟ୍ୟାକ୍ସିରେ ଆସି ବସୁଛନ୍ତି, ସେତେବେଳେ ଈଶାନଙ୍କ ଜୀବନର ଗତି ବଦଳି ଯାଉଛି। ଏହି ଆକସନ ଭରପୂର ମସାଲା ଫିଲ୍ମର ଟିଜରରେ ଈଶାନ ଓ ଅନନ୍ୟା ପୁଲିସ ଏବଂ ଅନ୍ୟ ଲୋକଙ୍କଠାରୁ ରକ୍ଷା ପାଇବା ପାଇଁ ଦୌଡ଼ୁଥିବା ନଜର ଆସୁଛି। ହିମାଂଶୁ କିଶନ ମେହରା, ଅଲ୍ଲୀ ଅବବାସ ଜଫର ଓ ଜି ଷ୍ଟୁଡିଓଜର ମିଳିତ ପ୍ରଯୋଜନାରେ ନିର୍ମାଣ ହୋଇଛି ‘ଖାଲି-ପିଲି’। ଜୁନ ୧୨ରେ ଏହି ଫିଲ୍ମ ରିଲିଜ ହେବାର ଥିଲା। ମାତ୍ର ଲକଡାଉନ ଯୋଗୁଁ ରିଲିଜ ସ୍ଥଗିତ ରଖାଯାଇଛି। ଓଟିଟି ପ୍ଲାଟଫର୍ମରେ ଏ ଫିଲ୍ମଟିକୁ ରିଲିଜ କରିବା ପାଇଁ ପ୍ରଯୋଜକମାନେ ବିଚାର କରୁଥିବା ଜଣାପଡ଼ିଛି। ଫିଲ୍ମରେ ଈଶାନ ଓ ଅନନ୍ୟା ଉଭୟଙ୍କର ଚରିତ୍ର ଟପୋରି ଷ୍ଟାଇଲର। ଏଥିରେ ଜୟଦୀପ ଅହଲାବତ ମୁଖ୍ୟ ଖଳନାୟକ ଚରିତ୍ରରେ ନଜର ଆସିବେ।
