ଭୁୁବନେଶ୍ୱର,ଏନ୍ଏନ୍ଏସ୍: ଆନ୍ତର୍ଜାତିକ ମହିଳା ଦିବସ ଉପଲକ୍ଷେ ଚନ୍ଦ୍ରଶେଖରପୁର ସାହିତ୍ୟ ସଂସଦର ମହିଳା ପତ୍ରିକା ‘ମାନବୀ’ ପକ୍ଷରୁ ଏକ ସମାବେଶ ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମକୁ ସାମାଜିକ କର୍ମୀ ତଥା ମହିଳା ନେତ୍ରୀ ପୁଷ୍ପା ଦାଶ ଉଦଘାଟନ କରିଥିଲେ । ଏହି ଅବସରରେ ଶ୍ରୀମତୀ ଦାଶ ମହିଳା ଦିବସ ପାଳନର ଇତିହାସ ସମେତ ସାଂପ୍ରତିକ ସାମାଜିକ ସ୍ଥିତିରେ ଲେଖିକାମାନଙ୍କର କର୍ତ୍ତବ୍ୟ ସମ୍ପର୍କରେ ଅଭିମତ ପ୍ରଦାନ କରିଥିଲେ । ସଂସଦର ପ୍ରତିଷ୍ଠାତା ସଂପାଦକ କବି ବସନ୍ତ ମାଝୀଙ୍କ ସଭାପତିତ୍ୱରେ ଅନୁଷ୍ଠିତ କାର୍ଯ୍ୟକ୍ରମରେ ‘ମାନବୀ’ ପତ୍ରିକାର ସଂପାଦନା ମଣ୍ଡଳୀର ଅନ୍ୟତମ ସଦସ୍ୟା ଡା. ପ୍ରବୀଣା ପରିଡ଼ା ପ୍ରାରମ୍ଭିକ ସୂଚନା ପ୍ରଦାନ କରିଥିଲେ । ଉପସ୍ଥିତ ବହୁ କବି ଓ କବୟତ୍ରୀ ତାଙ୍କର କବିତା ପାଠ କରିବା ସହ ଗୀତ ଗାନ ଏବଂ ନୃତ୍ୟାଭିନୟ ପ୍ରଦର୍ଶନ କରିଥିଲେ । କବି କ୍ଷଣପ୍ରଭା ମହାନ୍ତି, ରିତା ତ୍ରିପାଠୀ, ମୁଲତା ସିଂ, ଡା. ରଶ୍ମି କର, ସ୍ୱର୍ଣ୍ଣଲତା ମହାପାତ୍ର, ଡା. ରଶ୍ମି ଦାସ, ବିଶ୍ୱମିତ୍ରା ମିଶ୍ର, ସମିତା ସ୍ୱାଇଁ, ସ୍ନେହଲତା ଦାସ ଲେଙ୍କା, ମଧୁସ୍ମିତା ସା, ରଶ୍ମି ସାମଲ, ମୀନା ପ୍ରଧାନ, ମୈତ୍ରୀ ଭୂଷଣ ଖୁଣ୍ଟିଆ, ଡକ୍ଟର ରମେଶ ମହାନ୍ତି, ବିଦ୍ୟାଧର ଗୁରୁ ଓ କ୍ଷୀରୋଦ ପ୍ରମୁଖ ଯୋଗ ଦେଇଥିଲେ । ଶେଷରେ କବୀ ବିଶ୍ୱମିତ୍ରା ମିଶ୍ର ଧନ୍ୟବାଦ ଦେଇଥିଲେ ।
