ହାମିଲ୍ଟନ୍,ଏଜେନ୍ସି: ସ୍ମୃତି ମନ୍ଧାନା (୧୧୯) ଓ ହରମନ୍ପ୍ରୀତ୍ କୌର୍ (୧୦୯)ଙ୍କ ଶତକ ଏବଂ ଉଭୟଙ୍କ ମଧ୍ୟରେ ଚତୁର୍ଥ ୱିକେଟ୍ ପାଇଁ ୧୮୪ ରନ୍ର ରେକର୍ଡ ପାର୍ଟନରଶିପ୍ ସହାୟତାରେ ଚଳିତ ବିଶ୍ୱକପ୍ରେ ଭାରତ ନିଜର ତୃତୀୟ ମ୍ୟାଚ୍ରେ ଶନିବାର ୱେଷ୍ଟଇଣ୍ଡିଜ୍ ବିପକ୍ଷରେ ୧୫୫ ରନ୍ର ବୃହତ୍ ବିଜୟ ହାସଲ କରିଛି । ମନ୍ଧାନା ୧୨୩ ବଲ୍ରେ ୧୩ ଚୌକା ଓ ଦୁଇଟି ଛକା ସହ ୧୧୯ ରନ୍ କରି ଦିନିକିଆରେ ନିଜର ପଞ୍ଚମ ଶତକ ହାସଲ କରିଥିଲେ । ସେହିପରି କୌର୍ ୧୦୭ ବଲ୍ରେ ୧୦ ଚୌକା ଓ ଦୁଇଟି ଛକା ସହାୟତାରେ ୧୦୯ ରନ୍ କରିଥିଲେ । ୨୦୧୭ ବିଶ୍ୱକପ୍ରେ ଅଷ୍ଟ୍ରେଲିଆ ବିପକ୍ଷ ଅପରାଜିତ ୧୭୧ ରନ୍ ପରେ ଏହା କୌରଙ୍କ ପ୍ରଥମ ଏବଂ କ୍ୟାରିୟର୍ର ଶତକ ଥିଲା ।
ଉଭୟ ମନ୍ଧାନା ଏବଂ କୌର୍ଙ୍କ ମଧ୍ୟରେ ଚତୁର୍ଥ ୱିକେଟ୍ ପାଇଁ ହୋଇଥିବା ୧୮୪ ରନ୍ର ପାର୍ଟନର୍ଶିପ୍ ବିଶ୍ୱକପ୍ରେ ଭାରତର ଯେକୌଣସି ୱିକେଟ୍ରେ ସର୍ବାଧିକ ଭାଗୀଦାରୀ । ଏହା ସହାୟତାରେ ପ୍ରଥମେ ବ୍ୟାଟିଂ କରିଥିବା ଭାରତ ୮ ୱିକେଟ୍ ହରାଇ ୩୧୭ ରନ୍ର ବଡ଼ ସ୍କୋର୍ କରିଥିଲା । ଏହା ମଧ୍ୟ ବିଶ୍ୱକପ୍ରେ ଭାରତୀୟ ଦଳର ସର୍ବାଧିକ ସ୍କୋର୍ । ପରେ ଗତ ବିଶ୍ୱକପ୍ର ରନର୍ସଅପ୍ ଭାରତ ୪୦.୩ ଓଭର୍ରେ ଇଣ୍ଡିଜ୍ ଟିମ୍କୁ ମାତ୍ର ୧୬୨ ରନ୍ରେ ସୀମିତ ରଖି ନକ୍ଆଉଟ୍ ପାଇଁ ଯୋଗ୍ୟତା ଦୌଡ଼ରେ ସାମିଲ ହୋଇଛି । ଆକର୍ଷଣୀୟ ଶତକୀୟ ଇନିଂସ୍ ଖେଳିଥିବା ମନ୍ଧାନାଙ୍କୁ ପ୍ଲେୟର୍ ଅଫ୍ ଦି ମ୍ୟାଚ୍ ଘୋଷଣା କରାଯାଇଥିଲା । ତେବେ ମନ୍ଧାନା ଏହାକୁ କୌର୍ଙ୍କ ସହ ଭାଗ କରିଥିଲେ ।
ଏହି ବିଜୟ ଫଳରେ ଭାରତ ୩ ମ୍ୟାଚ୍ରୁ ୨ଟି ବିଜୟ ସହ ୪ ପଏଣ୍ଟ ପାଇ ଉନ୍ନତ ରନ୍ରେଟ୍ ଆଧାରରେ ଅଷ୍ଟ୍ରେଲିଆ, ନ୍ୟୁଜିଲାଣ୍ଡ ଓ ସାଉଥ୍ ଆଫ୍ରିକାକୁ ପଛରେ ପକାଇ ଶୀର୍ଷକୁ ଉଠିଛି । ବଡ଼ ଲକ୍ଷ୍ୟର ପିଛା କରୁଥିବା ଇଣ୍ଡିଜ୍ ସ୍କୋର୍କୁ ଦୁଇ ଓପ୍ନର୍ ଡିଆଣ୍ଡ୍ରା ଡଟ୍ଟିନ୍ (୬୨) ଓ ହେଲି ମାଥ୍ୟୁସ୍ (୪୩) ୧୨.୧ ଓଭର୍ରେ ୧୦୦ ରନ୍ ପାର୍ କରାଇଥିଲେ । ମାତ୍ର ସ୍ପିନର୍ ସ୍ନେହ ରାଣା (୨୨/୩) ଓ ପେସର୍ ମେଘନା ସିଂହ (୨୭/୨)ଙ୍କ ଯୋଡ଼ି ଆକର୍ଷଣୀୟ ବୋଲିଂ କରିବା ଫଳରେ ଇଣ୍ଡିଜ୍ ସ୍କୋର୍ ୧୯ ଓଭର୍ରେ ୧୧୪/୪କୁ ଖସି ଆସିଥିଲା । ଏହାପରେ ପୂଜା ବସ୍ତ୍ରାକାର (୨୧/୧) ଓ ରାଜେଶ୍ୱରୀ ଗାଏକ୍ୱାଡ୍ (୨୪/୧) ଯଥାକ୍ରମେ ଶିମେନ୍ କ୍ୟାମ୍ପ୍ବେଲ୍ (୧୧) ଓ ଚିନେଲ୍ ହେନ୍ରୀ (୭)ଙ୍କୁ ପ୍ୟାଭିଲିୟନ୍ ଫେରାଇ ସ୍କୋର୍କୁ ୬ ୱିକେଟ୍ରେ ୧୩୪ରେ ପହଞ୍ଚାଇଥିଲେ । ଗାଏକ୍ୱାଡ୍ ଓ ରାଣାଙ୍କ ମିଳିତ ପ୍ରୟାସରେ ଆଲିୟା ଆଲେନ୍ (୪) ରନ୍ଆଉଟ୍ ହେବା ପରେ ଝୁଲନ୍ ଗୋସ୍ୱାମୀ (୪୩/୧) ଅନିସା ମହମ୍ମଦ (୨)ଙ୍କୁ ଆଉଟ୍ କରିଥିଲେ । ଏହା ବିଶ୍ୱକପ୍ରେ ଝୁଲନ୍ଙ୍କ ୪୦ତମ ୱିକେଟ୍ ଥିଲା ।
ପୂର୍ବରୁ ଓପ୍ନର୍ ୟାସ୍ତିକା ଭାଟିଆ ୨୧ ବଲ୍ରୁ ୬ଟି ଚୌକା ସହ ଦ୍ରୁତ ୩୧ ରନ୍ କରି ମନ୍ଧାନାଙ୍କ ସହ ଦଳକୁ ଭଲ ପ୍ରାରମ୍ଭ ଦେଇଥିଲେ । ଭାଟିଆ ଓ ମନ୍ଧାନା ପ୍ରଥମ ୱିକେଟ୍ ପାଇଁ ୬.୩ ଓଭର୍ରେ ୪୯ ରନ୍ ଯୋଡ଼ିଥିଲେ । ଭାଟିଆଙ୍କୁ ବୋଲ୍ଡ କରି ସେଲ୍ମାନ୍ ଏହି ଭାଗୀଦାରୀରେ ବ୍ରେକ୍ ଲଗାଇଥିଲେ । ଏହାପରେ ମିତାଲି ରାଜ୍ (୫) ଓ ଦୀପ୍ତି ଶର୍ମା (୧୫) ଶସ୍ତାରେ ଆଉଟ୍ ହେବା ଫଳରେ ସ୍କୋର୍ ୭୮/୩ ହୋଇଯାଇଥିଲା । କିନ୍ତୁ ମନ୍ଧାନା ଓ କୌର୍ ଇନିଂସ୍କୁ ସମ୍ଭାଳିନେବା ସହ ୨୦ ଓଭର୍ରେ ସ୍କୋର୍କୁ ୧୦୦ ଅତିକ୍ରମ କରାଇଥିଲେ ।
ମନ୍ଧାନା ୬୬ ବଲ୍ରେ ୫ ଚୌକା ସହାୟତାରେ ଚଳିତ ବିଶ୍ୱକପ୍ରେ ପ୍ରଥମ ଅର୍ଦ୍ଧଶତକ ହାସଲ କରିବା ପରେ ତାଙ୍କର ଦ୍ୱିତୀୟ ଅର୍ଦ୍ଧଶତକ ୪୩ ବଲ୍ରୁ ଆସିଥିଲା । ୪୩ ଓଭର୍ରେ ସେଲମାନ୍ଙ୍କ ବଲ୍ରେ ମନ୍ଧାନା ଆଉଟ୍ ହେବା ପରେ କୌର୍ ଆକ୍ରମଣାତ୍ମକ ବ୍ୟାଟିଂ କରି ସ୍କୋର୍କୁ ୩୦୦ ପାର୍ କରାଯାଇଥିଲା । ତେବେ ୪୭ତମ ଓଭର୍ରେ ଆଲେନ୍ଙ୍କ ବଲ୍ରେ ୱିକେଟ୍ ପଛରେ କ୍ୟାମ୍ପ୍ବେଲ୍ଙ୍କ ହାତରେ କ୍ୟାଚ୍ ଆଉଟ୍ ହେବା ଫଳରେ ତାଙ୍କ ଇନିଂସରେ ପୂର୍ଣ୍ଣଚ୍ଛେଦ ପଡ଼ିଥିଲା । ତେବେ ମନ୍ଧାନା ଓ କୌର ଚତୁର୍ଥ ୱିକେଟ୍ରେ ୧୮୪ ରନ୍ ଯୋଡ଼ି ଥିରୁଶ୍ କାମିନୀ ଓ ପୁନମ୍ ରାଉତଙ୍କ ମଧ୍ୟରେ ହୋଇଥିବା ୧୭୫ ରନ୍ର ରେକର୍ଡକୁ ଭାଙ୍ଗିଛନ୍ତି । ଥିରୁଶ୍ ଓ ପୁନମ୍ ୨୦୧୩ରେ ଏହି ଭାଗୀଦାରୀ କରିଥିଲେ ।
