ଶିକାର କରିବାକୁ ଯାଇ ଶିକାରୀ ମୃତ, ମୃତ୍ୟୁର କାରଣ ଅସ୍ପଷ୍ଟ

ଦାରିଙ୍ଗବାଡ଼ି,ଏନ୍ଏନ୍ଏସ୍: ଦାରିଙ୍ଗବାଡ଼ି ଥାନା ଅଞ୍ଚଳରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ଶିକାର କରିବାକୁ ଯାଇଥିବା ଜଣେ ଯୁବକଙ୍କ ମୃତ୍ୟ ଘଟିଛି। ମୃତ ଯୁବକ ଜଣଙ୍କ ହେଉଛନ୍ତି ବି.ଡକେବାଡ଼ି ଗ୍ରାମର କ୍ରୀଷ୍ଣା ନାୟକ(୨୮)। ସୂଚନା ଅନୁସାରେ ଶନିବାର ବି.ଡକେବାଡ଼ି ଗ୍ରାମର ୪ରୁ ୫ଜଣ ଶିକାରୀ ଜଙ୍ଗଲକୁ ବିଭିନ୍ନ ମାରଣାସ୍ତ୍ର ଓ ଦେଶୀ ବନ୍ଧୁକ ଧରି ଯାଇଥିଲେ।

ରବିବାର ଅପରାହ୍ଣରେ ଶିକାରକୁ ଯାଇଥିବା ସହଯୋଗୀ ଶିକାରୀମାନେ କ୍ରୀଷ୍ଣାଙ୍କ ମୃତଦେହକୁ ନେଇ ଶିକାରୀମାନେ ତାଙ୍କ ଘରେ ପହଞ୍ଚିଥିଲେ। ଏନେଇ ସୋମବାର ସକାଳୁ ଦାରିଙ୍ଗବାଡ଼ି ଥାନାରେ ପରିବାର ଲୋକେ ଲିଖିତ ଅଭିଯୋଗ କରିଛନ୍ତି। ଅଭିଯୋଗ ପାଇ ଦାରିଙ୍ଗବାଡ଼ି ଥାନା ପୁଲିସ ମୃତ କ୍ରିଷ୍ଣାଙ୍କ ଶବକୁ ଜବତ କରି ଶବ ବ୍ୟବଚ୍ଛେଦ ପାଇଁ ପଠାଇଥିବା ଥାନା ଅଧିକାରୀ କୌଶିକ ମାଝୀ ପ୍ରକାଶ କରିଛନ୍ତି। ଏଥି ସହିତ ଏହି ଘଟଣାରେ ଏକାଧିକ ଲୋକଙ୍କୁ ଥାନାକୁ ଆଣି ପଚରାଉଚୁରା ଚଳାଇଥିବା ଶ୍ରୀ ମାଝୀ ପ୍ରକାଶ କରିଛନ୍ତି। ତେବେ କ୍ରିଷ୍ଣାଙ୍କ ମୃତ୍ୟୁ କିଭଳି ହୋଇଛି ସେ ନେଇ ପୁଲିସ ତଦନ୍ତ ଜାରି ରଖିଛି।