କୋରାପୁଟ,ଏନ୍ଏନଏସ୍: ପଟ୍ଟାଙ୍ଗିର ଗଙ୍ଗା ପ୍ରସାଦ ଚୌଧରୀ ହତ୍ୟା ମାମଲାରେ ପୁଲିସ୍ ସୋମବାର ଆଉ ଜଣେ ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଛି। ଗିରଫ ଅଭିଯୁକ୍ତ ଜଣକ ପଟ୍ଟାଙ୍ଗି ଥାନାରେ କାର୍ୟ୍ୟରତ ହୋମଗାର୍ଡ ସୁନୀଲ କୁମାର ପାୀଢୀ ବୋଲି ସୁନାବେଡା ଏସଡିପିଓ ନିରଞ୍ଜନ ବେହେରା ସୂଚନା ଦେଇଛନ୍ତି। ସୂଚନା ଥାଉକି, ଗତ ୪ ତାରିଖ ସକାଳେ ଗଙ୍ଗା ପ୍ରସାଦ ଚୌଧରୀ(୨୭)ଙ୍କ ମୃତଦେହ ପଟ୍ଟାଙ୍ଗି ଗଣେଶ ମନ୍ଦିର ନିକଟରେ ମିଳିଥିଲା। ଅଭିଯୋଗ ଅନୁଯାୟୀ ପୁଲିସ୍ ଏକ ହତ୍ୟା ମାମଲା ରୁଜୁ କରି ତଦନ୍ତ କରୁଥିବାବେଳେ ୧୨ ତାରିଖରେ ମୁଖ୍ୟ ଅଭିଯୁକ୍ତ ଅନୀଲ୍ ପାଢୀ, ସହଯୋଗୀ ଅଜିତ ଖୀଲ ଓ ପାରଳାଖେମୁଣ୍ଡିର ସୁପାରୀ କିଲର୍ ଗଣେଶ ରାଉଳକୁ ଗିରଫ କରିଥିଲା।
ତେବେ ପୁଲିସର ଏହି କାର୍ୟ୍ୟରେ ମୃତ ଯୁବକର ପରିବାର ଲୋକେ ଓ ଗ୍ରାମବାସୀ ଅସନ୍ତୋଷ ବ୍ୟକ୍ତ କରି ପୁଲିସ ବିରୋଧରେ ଶୋଭାଯାତ୍ରା କରିଥିଲେ । ହତ୍ୟାର ମୁଖ୍ୟ ଖଳନାୟକ ସୁନୀଲ୍ ପାଢୀ, ଭାସ୍କର ପାଢୀକୁ ଗିରଫ କରିବା ସହ ଘଟଣାର କ୍ରାଇମବ୍ରାଞ୍ଚ ତଦନ୍ତ ଦାବି କରିଥିଲେ। ପୁଲିସ୍ ଆଜି ସୁନୀଲ ପାଢୀକୁ ଗିରଫ କରି କୋର୍ଟ ଚାଲାଣ କରିଥିବାବେଳେ ଆଉ ଜଣେ ସୁପାରି କିଲରକୁ ଅତିଶୀଘ୍ର ଗିରଫ କରାଯିବ ବୋଲି ଏସଡିପିଓ ସୂଚନା ଦେଇଛନ୍ତି।
