ବ୍ରାହ୍ମଣୀ ଗାଁ,ଏନ୍ଏନ୍ଏସ୍: କନ୍ଧମାଳ ଜିଲ୍ଲା ବ୍ରାହ୍ମଣୀ ଗାଁ ଥାନା ଅଞ୍ଚଳ କ.ନୂଆଗାଁ ନିକଟସ୍ଥ ବାଡ଼ା ସୁରୁ ଜଙ୍ଗଲର ଏକ ଗଛରୁ ଯୁବକଙ୍କ ଝୁଲନ୍ତା ମୃତ ଦେହ ଉଦ୍ଧାର ହୋଇଛି। ବ୍ରାହ୍ମଣୀ ଗାଁ ପୁଲିସ ମୃତ ଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ବ୍ରାହ୍ମଣୀ ଗାଁ ସ୍ୱାସ୍ଥ୍ୟ କେନ୍ଦ୍ରକୁ ପଠାଇଥିବା ଜଣାପଡିଛି।
ସୂଚନା ଅନୁଯାୟୀ ବ୍ରାହ୍ମଣୀ ଗାଁ ପଞ୍ଚାୟତର କ.ନୂଆଗାଁ ଗ୍ରାମର ଅକ୍ଷୟ ପାତ୍ର(୨୫)ଗତ ସୋମବାର ଠାରୁ ନିଖୋଜ ଥିଲେ।ପରିବାର ଲୋକେ ନିଜର ଆତ୍ମୀୟ ସ୍ୱଜନ, ସମ୍ପର୍କୀୟ, ଆଖ ପାଖ ଚାରିଆଡେ ବହୁତ ଖୋଜାଖୋଜି କରୁଥିଲେ। ଖବରପାଇ ପରିବାର ଲୋକେ ବାଡ଼ା ସୁରୁ ଜଙ୍ଗଲରେ ଖୋଜାଖୋଜି କରିବା ବେଳେ ଏକ ବୃକ୍ଷରେ ଯୁବକଙ୍କ ମୃତ ଦେହକୁ ଝୁଲନ୍ତା ଅବସ୍ଥାରେ ଦେଖିବାକୁ ପାଇଥିଲେ। ପରେ ବ୍ରାହ୍ମଣୀ ଗାଁ ଥାନାକୁ ଖବର ଦେଇଥିଲେ।
ଏନେଇ ପୁଲିସ ଏକ ମାମଲା ରୁଜୁ କରି ଘଟଣାର ତଦନ୍ତ କରୁଥିବା ବେଳେ ପରିବାର ପକ୍ଷରୁ ପୁଅକୁ ହତ୍ୟା କରାଯାଇଥିବା ଅଭିଯୋଗ ହୋଇଛି। କେହି ଦୁର୍ବୃତ୍ତ ହତ୍ୟା କରିବା ପରେ ଆତ୍ମ ହତ୍ୟାର ରୁପ ଦେବା ପାଇଁ ଚେଷ୍ଟା କରାଯାଇଥିବା ନେଇ ପରିବାର ଲୋକେ ଅଭିଯୋଗ କରିଛନ୍ତି।
