ଲକଡାଉନ ସମୟରେ ଚାଲିଥିଲା ଜୁଆଖେଳ, ପୁଲିସର ଚଢ଼ଉରେ ୭ ଗିରଫ

ବଲାଙ୍ଗିର,ଏନ୍ଏନ୍ଏସ୍: ଲକଡାଉନ ସମୟରେ ବଲାଙ୍ଗିର ସହରର ବିଭିନ୍ନ ସ୍ଥାନରେ ଜୁଆଖେଳ ଜୋରଦାର ଚାଲିଛି। ଗତ କିଛି ଦିନ ସହର ଉପକଣ୍ଠରେ ଏକ ଜୂଆ ଆଡ୍ଡା ଉପରେ ପୁଲିସ ଚଢାଉ କରି ନଗଦ ଟଙ୍କା ସହିତ ଜୁଆଡିମାନଙ୍କୁ ଗିରଫ କରିଥିଲା । କିନ୍ତୁ ତଥାପି ମଧ୍ୟ ଜୁଆଡିମାନେ ସୁଧୁରି ନାହାନ୍ତି । ପୂର୍ବବତ ସେମାନେ ତାଙ୍କ ଖେଳ ଜାରି ରଖିଛନ୍ତି । ତେବେ ପୁଲିସ ପୁଣିଥରେ ଏକ ଜୁଆଆଡ୍ଡା ଉପରେ ଚଢଉ କରି ୭ ଜଣ ଜୁଆଡିଙ୍କୁ ଗିରଫ କରିଛି।

ଟାଉନଥାନା ଅଧିକାରୀ ସଂଗ୍ରାମ ପଟ୍ଟନାୟକଙ୍କ ସୂଚନା ଅନୁଯାୟୀ, ସହରର ବ୍ରାହ୍ମଣପଡା ସ୍ଥିତ ଏକ ଝୁପୁଡି ଘର ଭିତରେ ଜୁଆଖେଳ ଚାଲୁଥିବା ନେଇ ଶୁକ୍ରବାର ସନ୍ଧ୍ୟାରେ ଖବର ମିଳିଥିଲା । ଖବର ଆଧାରରେ ପୁଲିସ ରାତି ୮ ଟା ସମୟରେ ଜୁଆ ଆଡ୍ଡା ଉପରେ ଚଢଉ କରିଥିଲା ।

ଚଢଉ ସମୟରେ ପୁଲିସ ୭ ଜଣ ଜୁଆଡିଙ୍କୁ ଗିରଫ କରିବା ସହିତ ସେମାନଙ୍କ ନିକଟରୁ ୨୧ ହଜାର ୨୦୦ ଟଙ୍କା , ୫ ଟି ମୋବାଇଲ ଫୋନ ଓ ଜୁଆ ଖେଳ ପାଇଁ ବ୍ୟବହୃତ ହେଉଥିବା ତାସ ପୁଡିଆ ଜବତ କରିଥିଲା । ଗିରଫ ହୋଇଥିବା ଜୁଆଡିମାନେ ହେଲେ ବ୍ରାହ୍ମଣପଡାର ଅରୁଣ ରାଉତ, ପରମାନନ୍ଦ ପୁଟେଲ, ରିକି ରାଉତ, ବାବୁ ସ୍ୱାଇଁ, ହାଟପଦା ପଡାର ବାବଲୁ ସ୍ୱାଇଁ, ଠିକାଦାରପଡାର ରାଜେଶ୍ୱର ନାୟକ ଓ ବ୍ରାହ୍ମଡପଡାର ବିକି ରାଉତ। ଏହି ସମସ୍ତଙ୍କୁ ଆଜି କୋର୍ଟ ଚାଲାଣ କରାଯିବ ବୋଲି ଥାନାଧିକାରୀ କହିଛନ୍ତି।