କଲ୍ଲାକୁରିଚୀ,ଏନ୍ଏନ୍ଏସ୍: ମଙ୍ଗଳବାର ରାତିରେ ତାମିଲନାଡୁର କଲ୍ଲାକୁରିଚୀ ଜିଲ୍ଲା ଅନ୍ତର୍ଗତ ଶଙ୍କରପୁରମ୍ ସ୍ଥିତ ଗୋଟାଏ ପାଇକାରୀ ବାଣ ଦୋକାନରେ ଅଗ୍ନିକାଣ୍ଡ ଘଟି ୫ ଜଣ ଲୋକଙ୍କର ମୃତ୍ୟୁ ଘଟିଛି ଏବଂ ୧୦ ଜଣରୁ ଊର୍ଦ୍ଧ୍ୱ ବ୍ୟକ୍ତି ପୋଡ଼ି ଆହତ ହୋଇଛନ୍ତି। ଉପରୋକ୍ତ ବାଣ ଦୋକାନକୁ ଲାଗିଥିବା ଅନ୍ୟ ଦୋକାନଗୁଡ଼ିକୁ ବି ନଆଁ ବ୍ୟାପି ଯାଇଥିଲା। ଦୋକାନରେ ଥିବା ‘ଏଲ୍ପିଜି’ ସିଲିଣ୍ଡର୍ ଫାଟି ଯିବାରୁ ନଆଁ ହୁତୁହୁତୁ ହୋଇ ଜଳିଥିଲା।
ଦୀପାବଳି ଲାଗି ବାଣ କିଣିବାକୁ ଉକ୍ତ ଦୋକାନରେ ଲୋକମାନଙ୍କର ଗହଳି ହୋଇଥିଲା। ଅଗ୍ନିକାଣ୍ଡ ଯୋଗୁଁ ଉକ୍ତ ଗ୍ରାହକଙ୍କ ମଧ୍ୟରୁ ଅନେକ ପୋଡ଼ି ଆହତ ହୋଇଛନ୍ତି। ସାଂଘାତିକ ଆହତ ହୋଇଥିବା ୧୦ ଜଣରୁ ଅଧିକ ବ୍ୟକ୍ତିଙ୍କୁ ତୁରନ୍ତ ‘କଲ୍ଲାକୁରିଚୀ ଗଭର୍ଣ୍ଣନ୍ମେଣ୍ଟ୍ ଜେନେରାଲ୍ ହସ୍ପିଟାଲ୍’କୁ ନିଆଯାଇଥିଲା। ନିଆଁ ଲିଭାଇବାକୁ ଘଟଣାସ୍ଥଳକୁ କଲ୍ଲାକୁରିଚୀ ଏବଂ ତିରୁକୋଇଲ୍ୟୁର୍ରୁ ଦମକଳ ଯାଇଥିଲା। ରିପୋର୍ଟ ଲେଖାଯିବା ବେଳେକୁ ଏହି ଅଘଟଣରେ ମୃତାହତ ହୋଇଥିବା ବାଣ ଦୋକାନ ଓ ଆଖପାଖ ଦୋକାନର ଅଳ୍ପ କେତେକ କର୍ମଚାରୀଙ୍କର ପରିଚୟ ମିଳିପାରି ନଥିଲା। ଅଗ୍ନିକାଣ୍ଡ ଯୋଗୁଁ ସମ୍ପୃକ୍ତ ଅଞ୍ଚଳରେ ଯାନବାହନ ଚଳାଚଳ ବାଧା ପାଇଥିଲା।
ଦୁର୍ଘଟଣା ସମ୍ପର୍କରେ ଅବଗତ ହେବା ପରେ ମୁଖ୍ୟମନ୍ତ୍ରୀ ଏମ୍. କେ. ଷ୍ଟାଲିନ୍ ଶୋକବ୍ୟକ୍ତ କରିବା ସହ ମୃତବ୍ୟକ୍ତିଙ୍କ ପରିବାରବର୍ଗଙ୍କ ପାଇଁ ୫ ଲକ୍ଷ ଟଙ୍କା ଲେଖାଏଁ ଅନୁକମ୍ପାମୂଳକ ସହାୟତା ଘୋଷଣା କରିଛନ୍ତି।
