ଶେଷରେ କୋଟିଆରେ ଆନ୍ଧ୍ର କଲା ଜିଲା ପରିଷଦ ନିର୍ବାଚନ
କୋରାପୁଟ,ଏନ୍ଏନ୍ଏସ୍: ବିବାଦୀୟ କୋଟିଆରେ ଆନ୍ଧ୍ର ସରକାର ଜୋର ଜବରଦସ୍ତ ଜିଲ୍ଲା ପରିଷଦ ଓ ସମିତି ସଭ୍ୟ ନିର୍ବାଚନ କରାଇବାରେ ସଫଳ ହୋଇଛି। ଓଡ଼ିଶାର ବିରୋଧ ସତ୍ୱେ ଗତ ଫେବୃଆରୀ ୧୩ରେ କୋଟିଆ ପଂଚାୟତର ତଳଗଞ୍ଜେଇପଦର, ଫାଟୁସିନେରୀ ଓ ଫଗୁଣସିନେରୀରେ ସରପଞ୍ଚ ନିର୍ବାଚନ ଆୟୋଜନ କରିଥିଲା। ସେତେବେଳେ ନିର୍ବାଚନ କରି ଅଦାଲତ ଆଦେଶର ଅବମାନନା କରିଥିବାବେଳେ ବର୍ତ୍ତମାନ କୋଟିଆରେ ଜିଲ୍ଲା ପରିଷଦ ଓ ସମିତି ସଭ୍ୟ ନିର୍ବାଚନ କରି ଆନ୍ଧ୍ର ପୁଣି ଦାଦାଗିରି ଦେଖାଇବାକୁ ଅପଚେଷ୍ଟା କରିଛି। ଗତ କିଛିଦିନ ମଧ୍ୟରେ କୋଟିଆର ବିଭିନ୍ନ ଗ୍ରାମରେ କରୋନା ଆକ୍ରାନ୍ତ ଚିହ୍ନଟ ହେବାପରେ କୋରାପୁଟ ଜିଲ୍ଲା ପ୍ରଶାସନ ୭-୯ତାରିଖ ଯାଏ ସମଗ୍ର କୋଟିଆ ପଂଚାୟତରେ ୧୪୪ ଧାରା ଜାରି କରିଛନ୍ତି। ତେବେ ଆନ୍ଧ୍ର ସରକାର ୧୪୪ ଧାରାକୁ ବେଖାତିର କରି ପୂର୍ବ କାର୍ଯ୍ୟସୂଚୀ ଅନୁଯାୟୀ ଗୁରୁବାର ନିର୍ବାଚନ କରାଇଛନ୍ତି। ଫଳରେ ୨ ରାଜ୍ୟ ମଧ୍ୟରେ ଥିବା ଭାଇଚାରା ଓ ସୁସମ୍ପର୍କରେ ଦାଗ ଲାଗିଛି। କୋଟିଆକୁ ନେଇ ଓଡିଶା-ଆନ୍ଧ୍ର ମୁହାଁମୁହିଁ ହୋଇଥିବାବେଳେ ଘଟଣା ସର୍ବୋଚ୍ଚ ନ୍ୟାୟାଳୟରେ ରହିଛି। ଆନ୍ଧ୍ର ସରକାର ଦ୍ୱାରା କରାଯାଉଥିବା ଜିଲ୍ଲା ପରିଷଦ ନିର୍ବାଚନକୁ ପ୍ରଥମେ ଆନ୍ଧ୍ରପ୍ରଦେଶ ଉଚ୍ଚ ନ୍ୟାୟାଳୟ ସ୍ଥଗିତ କରିଥିଲେ ମଧ୍ୟ ବୁଧବାର ଏକ ୩ଜଣିଆ ଖଣ୍ଡପୀଠ ଶୁଣାଣି କରି ଭୋଟ ଗ୍ରହଣ ପାଇଁ ଅନୁମତି ଦେଇଥିଲେ। ଆନ୍ଧ୍ରପ୍ରଦେଶର ନିର୍ବାଚନକୁ କୋରାପୁଟ ଜିଲ୍ଲା ପ୍ରଶାସନ ସମେତ ସବୁ ରାଜନୈତିକ ଦଳର ନେତା ବିରୋଧ କରି କୋଟିଆରେ ଉପସ୍ଥିତ ରହି ନିର୍ବାଚନକୁ ପ୍ରତିହତ କରିବାକୁ ପ୍ରସ୍ତୁତ ଥିଲେ। ଜୟପୁର ବିଧାୟକ ତାରାପ୍ରସାଦ ବାହିନୀପତି, କୋରାପୁଟ ବିଧାୟକ ରଘୁରାମ ପଡାଲ, ପଟ୍ଟାଙ୍ଗୀ ବିଧାୟକ ପ୍ରୀତମ ପାଢ଼ୀ, ଲକ୍ଷ୍ମୀପୁର ବିଧାୟକ ପ୍ରଭୂ ଯାନୀ, ବିଜେଡି ଜିଲ୍ଲା ସଭାପତି ଇଂ.ଈଶ୍ୱର ଚନ୍ଦ୍ର ପାଣିଗ୍ରାହୀ, ବିଜେପି ନେତା ଜୟରାମ ପାଙ୍ଗୀ, କୋରାପୁଟ ଉପଜିଲ୍ଲାପାଳ ଲଳିତ କୁମାର କହଁର, ସୁନାବେଡ଼ା ଏସଡିପିଓ ନିରଞ୍ଜନ ବେହେରା, କୋରାପୁଟ ଏସଡିପିଓ ଗୁଣନିଧି ମଲ୍ଲିକ, ପଟ୍ଟାଙ୍ଗୀ, ଲମତାପୁଟ ବିଡିଓ ଓ ତହସିଲଦାର ପ୍ରମୁଖ କୋଟିଆର ନେରେଡିବାଲସାରେ ଉପସ୍ଥିତ ରହିଥିଲେ।
