ପାଟଣାଗଡ଼,ଏନ୍ଏନ୍ଏସ୍: ପାଟଣାଗଡ଼ ଉପଖଣ୍ଡ ବେଲପଡ଼ା ଥାନା ଅନ୍ତର୍ଗତ ଘାଗୁଲି ଗ୍ରାମ ନିକଟସ୍ଥ ମାଝିପଡ଼ାରେ ଏକ ଅଭାବନୀୟ ଘଟଣା ଘଟିଛି। ପୁଅର କୋଦାଳ ଚୋଟରେ ବାପାର ମୃତ୍ୟୁ ହୋଇଥିବା ଜଣାପଡ଼ିଛି। ମିଳିଥିବା ରିପୋର୍ଟ ମୁତାବକ, ଘାଗୁର୍ଲ ଗ୍ରାମର ବୈକୁଣ୍ଠ ମାଝୀ ଓ ତାଙ୍କ ପୁଅ ମହେଶ ମାଝୀଙ୍କ ମଧ୍ୟରେ ଛେଳି ଚରାଇବାକୁ ନେଇ ବଚସା ହୋଇଥିଲା। ପାଟି ତୁଣ୍ଡ ଏତେ ଉଗ୍ର ହୋଇଥିଲା ଯେ ପୁଅ ମହେଶ୍ୱର ରାଗିଯାଇ ଏକ କୋଦାଳରେ ନିଜ ବାପାକୁ ଆଘାତ କରିଥିଲା। ପରେ ମହେଶ୍ୱର ତଣ୍ଟି ଚିପି ବାପାକୁ ହତ୍ୟା କରିଥିଲା। ବୈକୁଣ୍ଠଙ୍କୁ ପରିବାର ଲୋକେ ବେଲପଡ଼ା ଡାକ୍ତରଖାନା ନେଇଥିଲେ ହେଁ ଡାକ୍ତର ସେଠାରୁ ତାଙ୍କୁ ମୃତ ଘୋଷଣା କରିଥିଲେ। ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ମହେଶ୍ୱରକୁ ଗିରଫ କରିବା ସହ ଅଧିକ ତଦନ୍ତ ଜାରି ରଖିଛି। ତେବେ ପାଟଣାଗଡ଼ ଏସଡିପିଓ ଜ୍ୟୋର୍ତିମୟ ଭୁକ୍ତାଙ୍କ ସହ ବଲାଙ୍ଗିରରୁ ସାଇଣ୍ଟିଫିକ ଟିମ ପହଞ୍ଚି ଅଧିକ ତଦନ୍ତ ଜାରି ରଖିଥିବାବେଳେ ମହେଶ୍ୱର ମାଝୀଙ୍କ ବିରୁଦ୍ଧରେ ଏକ ହତ୍ୟା ମାମଲା ରୁଜୁ କରାଯାଇଥିବା ବେଲପଡ଼ା ଥାନାଧିକାରୀ ବୁଲୁ ମୁଣ୍ଡା ସୂଚନା ଦେଇଛନ୍ତି।
