ରିଆମାଳ,ଏନ୍ଏନ୍ଏସ୍: ରିଆମାଳ ବ୍ଲକ ଅନ୍ତର୍ଗତ ସେଣ୍ଢା ଉଚ୍ଚ ବିଦ୍ୟାଳୟର ପ୍ରଧାନଶିକ୍ଷକ ଦିଗାମ୍ବର ଗଡ଼ନାୟକ ଆଜି ଅବସର ନେଲା ପରେ ପ୍ରଧାନଶିକ୍ଷକଙ୍କୁ ଛାତ୍ରଛାତ୍ରୀ ଓ ଶିକ୍ଷକ ଶିକ୍ଷୟିତ୍ରୀଙ୍କ ପକ୍ଷରୁ ବିଦାୟକାଳୀନ ସମ୍ବର୍ଦ୍ଧନା ଦିଆଯାଇଛି । ସହକାରୀ ଶିକ୍ଷକ ବିଜୟ କୁମାର ସାହୁ ସ୍ୱାଗତ ଭାଷଣ ଓ ସଭାପତିତ୍ୱ କରି ମହାଦ୍ରୁମ ପରି ଏକ ବିଜ୍ଞ ଶିକ୍ଷକଙ୍କୁ ଏ ବିଦ୍ୟାଳୟ ଆଜି ହରେଇଲା ବୋଲି ପ୍ରକାଶ କରିଛନ୍ତି । ଦେଶ ପାଇଁ ଜୀବନ ଦେବା ସହିତ ଛାତ୍ର ଜୀବନରୁ ଦୁର୍ନୀତି ବିରୋଧରେ ଲଢ଼ିବା ପାଇଁ ଶିଖିବା ଉଚିତ୍ ବୋଲି ଶିକ୍ଷାବିତ୍ ଧରଣୀଧର ବେହେରା କହିଥିଲେ । ସେହିପରି ଅବସରପ୍ରାପ୍ତ ଜିଲ୍ଲା ଶିକ୍ଷାଧିକାରୀ ଈଶ୍ୱର ଦଳେଇ ଓ ଅବସରପ୍ରାପ୍ତ ପ୍ରଧାନଶିକ୍ଷକ ଟଙ୍କଧର ଦେହୁରୀ ସମ୍ମାନିତ ଅତିଥିଭାବେ ଯୋଗଦେଇ ଆଜିଠାରୁ ଦାୟିତ୍ୱ ନେଇଥିବା ପ୍ରଧାନଶିକ୍ଷକଙ୍କୁ ସମସ୍ତ ଛାତ୍ରଛାତ୍ରୀ ସମ୍ମାନ ଦେବା ଉଚିତ ଓ ତାଙ୍କର ନିସୃତ ବାଣୀକୁ ଗ୍ରହଣ କରିବା ଉଚିତ ବୋଲି ପ୍ରକାଶ କରିଥିଲେ । ଅବସର ନେଇଥିବା ଶିକ୍ଷକଙ୍କୁ ସମସ୍ତ ଛାତ୍ରଛାତ୍ରୀ ଏବଂ ଶିକ୍ଷକ ଶିକ୍ଷୟିତ୍ରୀମାନେ ପୁଷ୍ପ ଗୁଚ୍ଛ ଓ ଉପଢ଼ୌକନ ଦେଇ ବିଦାୟକାଳୀନ ସମ୍ବର୍ଦ୍ଧନା ଦେଇଥିଲେ । ଶିକ୍ଷୟତ୍ରୀ ମମତା ମଞ୍ଜରୀ ପ୍ରଧାନ ଧନ୍ୟବାଦ ଦେଇଥିଲେ ।
