କାଶ୍ମୀର,ଏଜେନ୍ସି: ଶ୍ରୀନଗରର ବଟମାଲୁ ଅଞ୍ଚଳରେ ଆଜି ଭୋରରୁ ସୁରକ୍ଷାବାହିନୀ ଓ ଆତଙ୍କୀଙ୍କ ମଧ୍ୟରେ ଗୁଳିବିନିମୟ ଜାରି ରହିଛି। ତେବେ ଆଜି ସକାଳ ପାଖାପାଖି ସାଢ଼େ ୭ଟା ସମୟରେ ସେନା ପକ୍ଷରୁ ଜଣେ ଆତଙ୍କବାଦୀକୁ ନିହତ କରାଯାଇଥିବାବେଳେ ବର୍ତ୍ତମାନ ଆଉ ୨ ଆତଙ୍କବାଦୀ ନିହତ ହୋଇଥିବା ଜଣାପଡ଼ିଛି। ଏଥିସହ ଜଣେ ସିଆରପିଏଫ୍ ଅଫିସର ଆହତ ହୋଇଥିବା ସୂଚନା ମିଳିଛି। ଆଉ କିଛି ଆତଙ୍କବାଦୀ ଲୁଚି ରହିଥିବା ସନ୍ଦେହ କରି ସିଆରପିଏଫ୍ ଯବାନ ଏବଂ ଜାମ୍ମୁ-କାଶ୍ମୀର ପୁଲିସ ସର୍ଚ୍ଚ ଅପରେସନ ଜାରି ରଖିଛି।
ବଟମାଲୁ ଅଞ୍ଚଳରେ ଆତଙ୍କବାଦୀ ଲୁଚିଥିବା ଗୁଇନ୍ଦା ସୂଚନା ମିଳିବା ପରେ ସେନା ପକ୍ଷରୁ ବଡ ଧରଣର ସର୍ଚ୍ଚ ଅପରେସନ ଆରମ୍ଭ ହୋଇଥିଲା। ଆଖପାଖ ଅଞ୍ଚଳକୁ ପୁରା କର୍ଡନ କରାଯାଇଥିଲା। ବଟମାଲୁ ଅଞ୍ଚଳରେ ଆତଙ୍କବାଦୀ ପ୍ରଥମେ ସେନା ଉପରକୁ ଗୁଳି ମାଡ କରି ଖସି ଯିବାକୁ ଉଦ୍ୟମ କରିବା ପରେ ଚାରିପଟୁ ଘେରି ଜବାବ ଦେଇଥିଲା ଭାରତୀୟ ସେନା। ଏହି ଅପରେସନରେ ସିଆରପିଏଫ୍, ଜାମ୍ମୁ-କାଶ୍ମୀର ପୁଲିସ ଏବଂ ରାଷ୍ଟ୍ରୀୟ ରାଇଫଲର ୫୦ ଜଣ ଯବାନ ସାମିଲ ହୋଇଛନ୍ତି।
