କେନ୍ଦୁଝର,ଏନ୍ଏନ୍ଏସ୍: କେନ୍ଦୁଝର ବନଖଣ୍ଡ ସଦର ବନାଞ୍ଚଳ ଜଂଘିରା ବିଟ ଅଧୀନସ୍ଥ ବାରବାଙ୍କ ସଂରକ୍ଷିତ ଜଙ୍ଗଲରୁ ଶୁକ୍ରବାର ସକାଳେ ଏକ ମାଈ ହାତୀଛୁଆର ମୃତଦେହ ଉଦ୍ଧାର ହୋଇଛି। ହାତୀଟିର ବୟସ ପାଖାପାଖି ୩ ବର୍ଷ ହେବ ବୋଲି ସଦର ବନାଞ୍ଚଳ ଅଧିକାରୀ କହିଛନ୍ତି। ସୂଚନା ଅନୁସାରେ, ଜଂଘିରା ନିକଟସ୍ଥ ଟୁଙ୍ଗୁରୁବାହାଳୀ ପାଖ ବାରବାଙ୍କ ଜଙ୍ଗଲରେ ଏକ ହାତୀ ଛୁଆର ମୃତଦେହ ପଡିଥିବା ବନ କର୍ମଚାରୀଙ୍କୁ ଖବର ମିଳିଥିଲା । କେନ୍ଦୁଝର ଏ ସି ଏଫ ଘନଶ୍ୟାମ ମହାନ୍ତ, ସଦର ବନାଞ୍ଚଳ ଆଧିକାରୀ ଅରବିନ୍ଦ ନାଏକ, ଜଂଘିରା ଫରେଷ୍ଟର ସୁକୁମାର ଜେନା ଏବଂ ହରିଚନନ୍ଦନପୁର ପ୍ରାଣୀ ଚିକିତ୍ସା ଅଧିକାରୀ ଜୀବନ ମୁଣ୍ଡା ପ୍ରମୁଖ ଘଟଣାସ୍ଥଳରେ ପହଞ୍ଚି ହାତୀ ମୃତ୍ୟୁର କାରଣ ଆନୁସନ୍ଧାନ କରିଛନ୍ତି । ତେବେ ହାତୀ ଛୁଆ ମୃତ୍ୟୁର ପ୍ରକୃତ କାରଣ ଜଣାପଡିନଥିବାବେଳେ କେହିକେହି ଆନ୍ଥ୍ରାକ୍ସ ଯୋଗୁଁ ହାତୀଟିର ମୃତ୍ୟୁ ହୋଇଥିବା କହୁଛନ୍ତି । ଶବ ବ୍ୟବଚ୍ଛେଦ ପରେ ଏହାର ପ୍ରକୃତ କାରଣ ଜଣାପଡିବ ବୋଲି କୁହାଯାଉଛି ।
