ଭଦ୍ରକ,ଏନ୍ଏନ୍ଏସ୍: ଭଦ୍ରକ ଜିଲ୍ଲା ବନ୍ତ ବ୍ଲକ ଅନ୍ତର୍ଗତ ଆଗରପଡା ଥାନା ମହାନ୍ତିପଡା ଅଞ୍ଚଳରେ ହାତି ଆକ୍ରମଣରେ ବୃଦ୍ଧଙ୍କ ମୃତ। ବାଡି଼କୁ ଆମ୍ବ ଗୋଟାଇବାକୁ ଯାଇଥିବା ବେଳେ ହାତୀ ଆକ୍ରମଣରେ ଶିକାର ହେଲେ ବୃଦ୍ଧ। ମୃତ ବୃଦ୍ଧ ଜଣକ ହେଲେ ମହାନ୍ତି ପଡା ଅଞ୍ଚଳର ପାଗଳ ବେହେରା। ଗତ କିଛିଦିନ ହେବ ଉକ୍ତ ଅଞ୍ଚଳରେ ତାଣ୍ଡବ ରଚି ଚାଲିଛି ଦନ୍ତା ହାତୀ। ଭଦ୍ରକ ଜିଲ୍ଲାର ଅଗରପଡା ଅଞ୍ଚଳକୁ ଦନ୍ତା ହାତୀଟି ପ୍ରବେଶ କରିବା ସହ ଆଗରପଡା ଅଞ୍ଚଳରେ ବ୍ୟାପକ ଭାବେ ଫସଲ ନଷ୍ଟ କରିବା ସହ କିଛି ଘର ଭାଙ୍ଗି ଦେଇଛି ହାତୀ।
ଆଜି ମହାନ୍ତିପଡ଼ାରେ ସକାଳୁ ସକାଳୁ ପାଗଳ ବେହେରା (୭୦) ଆମ୍ଭ ତୋଳିବାକୁ ବାଡ଼ିକୁ ଯାଇଥିବା ବେଳେ ଦନ୍ତା ହାତୀଟି ବୃଦ୍ଧକୁ ଦଳି ମାରିଦେଇଛି। ଘଟଣାସ୍ଥଳରେ ଵୃଦ୍ଧର ମୃତ୍ୟୁ ହୋଇଛି। ପୂର୍ବରୁ ଦୁଇ ଗୋଟି ହାତୀ କେନ୍ଦୁଝର ଜଙ୍ଗଲରୁ ଆସି ଆଗରପଡାର ବିଭିନ୍ନ ଗ୍ରାମରେ ଯେମିତି ପାଟକନା ଓ ରାଉତରାୟ ଗାଡ଼ିଆ ଅଞ୍ଚଳକୁ ହାତୀ ଆସି ଲୋକମାନଙ୍କର କ୍ଷୟକ୍ଷତି କରିଛି। ଆଜି ହଠାତ ଦନ୍ତା ହାତୀ ଜଙ୍ଗଲ ଛାଡି ଗାଁ ଅଞ୍ଚଳରେ ପ୍ରବେଶ କରି ବୃଦ୍ଧକୁ ଦଳି ମାରି ଦେଇଥିବାରୁ ଲୋକମାନେ ଭୟଭୀତ ହୋଇପଡିଛନ୍ତି। ତେବେ ଘଟଣା ସ୍ଥଳରେ ବନ ବିଭାଗ କର୍ମଚାରୀ ପହଁଞ୍ଚିଥିବା ସୂଚନା ମିଳିଛି।
