ଫୁଲବାଣୀ,ଏନ୍ଏନ୍ଏସ୍ : କନ୍ଧମାଳ ଜିଲ୍ଲା ସାରଙ୍ଗଡ଼ ଥାନା ପୁଲିସ ବେଆଇନ ଦେଶୀ ମଦ ଭାଟିରେ ଚଢ଼ଉ କରି ୨ଜଣ ମହିଳା ଓ ଜଣେ ପୁରୁଷଙ୍କୁ ଗିରଫ କରି କୋର୍ଟ ଚାଲାଣ କରିଛି । ଏଥିସହିତ ଘଟଣାସ୍ଥଳରୁ ୧୨୦କେଜି ମହୁଲ ପୋଚ ନଷ୍ଟ କରିଛି ଓ ୬୦ ଲିଟର ମହୁଲି ମଦ ଜବତ କରିଛି। କରୋନାକୁ ନେଇ ଲୋକେ ଆତଙ୍କିତ ଥିବାବେଳେ କିଛି ଅସାମାଜିକ ଲୋକେ ଦେଶୀମଦ ରନ୍ଧା ଓ ବିକ୍ରି କରିବାରେ ମାତିଛନ୍ତି । ପୂର୍ବ ସୂଚନାପ୍ରକାରେ, ଆଜି ସାରଙ୍ଗଡ଼ ଥାନା ଅଧିକାରୀ ଅନିତା କିଡ଼ୋ ନିଜ ଟିମ୍ ସହ ବେଆଇନ ମଦ ଭାଟିରେ ଅଚାନକ ଚଢ଼ଉ କରିଥିଲେ। ଗିରଫ ହୋଇଥିବା ୩ଜଣଙ୍କ ମଧ୍ୟରୁ କୁମୁଦିନୀ ବେହେରା ଓ ଗୋପିନାଥ ନାୟକ ଗୁଡ୍ରିପଡ଼ି ଅଞ୍ଚଳର ହୋଇଥିବାବେଳେ ଯଶୋଦା ନାୟକ ପାଡ଼ାଙ୍ଗି ଅଞ୍ଚଳର ବୋଲି ପୁଲିସ ତରଫରୁ ସୂଚନା ମିଳିଛି । ଅନ୍ୟପଟେ ଏଭଳି ବେଆଇନ ମଦ କାରବାରକୁ ପ୍ରଶୟ ଦିଆଯିବ ନାହିଁ ଏବଂ ଅଭିଯୁକ୍ତଙ୍କ ବିରୁଦ୍ଧରେ କଠୋର କାର୍ୟ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସାରଙ୍ଗଡ଼ ଥାନା ମହିଳା ଆଇଆଇସି ଅନିତା କିଡ଼ୋ କହିଛନ୍ତି ।
