ନୂଆଦିଲ୍ଲୀ, ନୂଆ କୃଷି ଆଇନକୁ ବିରୋଧ କରି ଟ୍ରାକ୍ଟର ମାର୍ଚ୍ଚ ବେଳେ ଘଟିଥିବା ହିଂସାକାଣ୍ଡରେ ଅନେକ ସଂଖ୍ୟାରେ ପୋଲିସ କର୍ମଚାରୀ ଏବଂ ଯବାନ ଆହତ ହୋଇଛନ୍ତି । ଚାଷୀମାନଙ୍କ ସହ ଧସ୍ତାଧସ୍ତି ବେଳେ ପ୍ରାୟ ୮୩ ଜଣ ଯବାନ ଆହତ ହୋଇଛନ୍ତି ।
ଏହି ଘଟଣାକୁ ନେଇ ଦିଲ୍ଲୀ ପୋଲିସ କହିଛି ଯେ, ଯବାନମାନେ ସମସ୍ତ ସର୍ତ୍ତ ଅନୁପାଳନ କରିବା ପାଇଁ ସମସ୍ତ ପ୍ରକାର ପ୍ରୟାସ କରିଥିଲେ । କିନ୍ତୁ ପ୍ରଦର୍ଶନକାରୀମାନେ ସମୟ ପୂର୍ବରୁ ଟ୍ରାକ୍ଟର ମାର୍ଚ୍ଚ ଆରମ୍ଭ କରିଦେଇଥିଲେ । ଦିଲ୍ଲୀ ପୋଲିସର ବରିଷ୍ଠ ଅଧିକାରୀ ଆଲୋକ କୁମାର କହିଛନ୍ତି, ଭୟାନକ ଭାବେ ଟ୍ରାକ୍ଟର ଚଳାଇ ପୋଲିସ ଉପରକୁ ଆକ୍ରମଣ ପାଇଁ ପ୍ରୟାସ କରାଯାଇଥିଲା । ବିଭିନ୍ନ ସ୍ଥାନରେ ପ୍ରଦର୍ଶନକାରୀମାନେ ବ୍ୟାପକ ଭଙ୍ଗାରୁଜା କରିଥିଲେ ।
ସୂଚନା ଅନୁଯାୟୀ ଦିଲ୍ଲୀରେ ହିଂସାକୁ ଦେଖି ଆହୁରି ପ୍ରାୟ ୧୫୦୦ ରୁ ୨୦୦୦ ଯବାନଙ୍କୁ ମୁତୟନ କରାଯିବ । ଗଣତନ୍ତ୍ର ଦିବସ ପାଇଁ ପୂର୍ବରୁ ୪୫୦୦ ଅର୍ଦ୍ଧସାମରିକ ବଳ ମୁତୟନ ଥିଲେ ।
ଦିଲ୍ଲୀରେ କୃଷକଙ୍କ ଟ୍ରାକ୍ଟର ରାଲିରେ ହିଂସା ଘଟଣା ପରେ ଅନେକ ସ୍ଥାନରେ ଇଣ୍ଟରନେଟ୍ ସେବାକୁ ବନ୍ଦ କରିଦିଆଯାଇଛି । ସିଂଘୁ ବର୍ଡର, ଟିକରୀ ବର୍ଡର, ଗାଜୀପୁର ବର୍ଡର, ମୁବାରକା ଚୌକ ଏବଂ ନାଂଗଲୋଇାର ଇଣ୍ଟରନେଟ୍ ସେବାକୁ ବନ୍ଦ କରିଦିଆଯାଇଛି ।