ଦେବଗଡ଼,ଏନ୍ଏନ୍ଏସ୍: ବାରକୋଟ ଥାନା ଅନ୍ତର୍ଗତ ଦେପତଲା ଗ୍ରାମରେ ଡାହାଣୀ ସନ୍ଦେହରେ ଦମ୍ପତିଙ୍କୁ ଗ୍ରାମବାସୀଙ୍କ ସଂଘବଦ୍ଧ ମରଣାନ୍ତକ ଆକ୍ରମଣ ଓ ନିର୍ଯ୍ୟାତନା ଘଟଣାରେ ବାରକୋଟ ଥାନା ପୁଲିସ ୨ ଜଣଙ୍କୁ ଗିରଫ କରିଥିବା ଜଣାପଡ଼ିଛି। ଅଭିଯୁକ୍ତଦ୍ୱୟ ହେଲେ ଗଣ୍ଡ ପ୍ରଧାନ ଓ ତାଙ୍କ ଭାଇ ବୈଷ୍ଣବ ପ୍ରଧାନ । ମିଳିଥିବା ରିପୋର୍ଟ ମୁତାବକ, ଗଣ୍ଡ ପ୍ରଧାନଙ୍କ ସ୍ତ୍ରୀଙ୍କ ସ୍ୱାସ୍ଥ୍ୟ ଖରାପ ରହୁଥିବାରୁ ଗତ ଶନିବାର ଅନ୍ଧବିଶ୍ୱାସର ବଶବର୍ତ୍ତୀ ହୋଇ ସେହି ଗ୍ରାମର ଭୂୟାଁଣୀ ମହାକୁଳ ଓ ତାଙ୍କ ସ୍ୱାମୀ ଦେବାନନ୍ଦ ମହାକୁଳଙ୍କୁ ଗାଁ ଦାଣ୍ଡରେ ଉଲଗ୍ନ କରି ମାଡ଼ ମାରିଥିଲେ । ଅଭିଯୁକ୍ତଙ୍କ ଆକ୍ରମଣରେ ଗୁରୁତର ଅବସ୍ଥାରେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଚିକିତ୍ସିତ ହେବା ପରେ ପୀଡ଼ିତ ଦମ୍ପତି ବାରକୋଟ ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗ ଆଧାରରେ ବାରକୋଟ ପୁଲିସ ସକାଳେ ଗାଁରେ ଚଢ଼ଉ କରି ୨ ଅଭିଯୁକ୍ତଙ୍କୁ ଗିରଫ କରିବା ସହ ଅଧିକ ପଚରାଉଚୁରା ଓ ସ୍ୱାସ୍ଥ୍ୟ ପରୀକ୍ଷା ପାଇଁ ଦେବଗଡ଼କୁ ଆଣିଥିଲା । ତେବେ ଅନ୍ୟ ସହଯୋଗୀମାନେ ଏବେ ବି ଫେରାର ଥିବା ନେଇ ପୁଲିସ ସୂଚନା ଦେଇଛି ।
