ଭୁବନେଶ୍ୱର,ଏନ୍ଏନ୍ଏସ୍: ଆନ୍ତର୍ଜାତିକ ଖ୍ୟାତିସମ୍ପନ୍ନ ଚିତ୍ରଶିଳ୍ପୀ ତଥା ଅଭିନେତା ଚିନ୍ତାମଣି ବିଶ୍ୱାଳଙ୍କୁ ହାପି ମୋମେଣ୍ଟସ୍ ଇଣ୍ଡିଆ ଅନୁଷ୍ଠାନ ପକ୍ଷରୁ ସ୍ଥାନୀୟ ଜୟଦେବ ଭବନରେ ‘ଉତ୍କଳ ପ୍ରତିଭା ରତ୍ନ’ ସମ୍ମାନ ପ୍ରଦାନ କରାଯାଇଛି । ଚିନ୍ତାମଣି ବିଶ୍ୱାଳ ପୂର୍ବରୁ ଶ୍ରୀଗୀତଗୋବିନ୍ଦ ଉପରେ ତୈଳ ଚିତ୍ର, ଉତ୍କଳ ଜନନୀଙ୍କ ତୈଳ ଚିତ୍ର ଅଙ୍କନ କରିବା ସହିତ ଇଣ୍ଡିଆନ ମୋନାଲିସା ଅଙ୍କନ କରି ଖୁବ୍ ଚର୍ଚ୍ଚିତ ହୋଇଥିଲେ । ପୁନଃ ଓଡ଼ିଶାର ବିଲୁପ୍ତ ମାହାରୀ ନୃତ୍ୟକୁ ନେଇ ଛବି ଅଙ୍କନ କରି ଦେଶ ବିଦେଶରେ ଖୁବ୍ ଚର୍ଚ୍ଚିତ ହେବାସହ ଓଡ଼ିଆ ଚଳଚ୍ଚିତ୍ର ଓ ଧାରାବାହିକରେ ଖଳନାୟକ ଭାବେ ଅଭିନୟ କରି ଖ୍ୟାତି ଅର୍ଜନ କରିଛନ୍ତି । ଉକ୍ତ କାର୍ଯ୍ୟକ୍ରମରେ ଅତିଥିଭାବେ ଓଡ଼ିଶାର ପଦ୍ମଶ୍ରୀ ଦେବୀପ୍ରସନ୍ନ ପଟ୍ଟନାୟକ, ପଦ୍ମଶ୍ରୀ ପ୍ରଭାକର ମହାରଣା ଓ ପଦ୍ମଶ୍ରୀ ଇଲିଆନା ସିତାରିଷ୍ଟ ଯୋଗ ଦେଇଥିଲେ । ବିଶିଷ୍ଟ ସମାଜସେବୀ ରାଜେନ୍ଦ୍ର ପଣ୍ଡା କାର୍ଯ୍ୟକ୍ରମ ପରିଚାଳନା କରିଥିଲେ।
