ଫିରିଙ୍ଗିଆ,ଏନ୍ଏନ୍ଏସ୍: କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକ ଉଚ୍ଚ ମାଧ୍ୟମିକ ବିଦ୍ୟାଳୟର ଖେଳ ପଡ଼ିଆରେ ହକି ବିଶ୍ୱକପ୍ ଉପଲକ୍ଷେ ବ୍ଲକସ୍ତରୀୟ କ୍ରୀଡ଼ା ପ୍ରତିଯୋଗିତା ଉଦଘାଟିତ ହୋଇଯାଇଛି । ଫିରିଙ୍ଗିଆ ବିଡିଓ ରଶ୍ମି ରଞ୍ଜନ ମହନ୍ତଙ୍କ ଅଧ୍ୟକ୍ଷତାରେ ମୁଖ୍ୟଅତିଥି ଭାବେ ଫୁଲବାଣୀ ବିଧାୟକ ଅଙ୍ଗଦ କହଁର ଯୋଗଦେଇ ଆନୁଷ୍ଠାନିକ ଭାବେ ଦୀପ ପ୍ରଜ୍ୱଳନ ସହ କାର୍ଯ୍ୟକ୍ରମକୁ ଉଦଘାଟନ କରିଥିଲେ । ଅନ୍ୟ ଅତିଥିଙ୍କ ମଧ୍ୟରେ ବ୍ଲକ ଅଧ୍ୟକ୍ଷା ନମିତା କହଁର, ଜିଲ୍ଲା ପରିଷଦ ସଭ୍ୟ ନୀଳଗିରି ଦିଗାଲ, ଜିଲ୍ଲା ପରିଷଦ ସଭ୍ୟା ଜୟଶ୍ରୀ କହଁର, ବ୍ଲକ ଉପାଧ୍ୟକ୍ଷ ଅଜିତ୍ ସାହୁ, ବ୍ଲକର ୨୪ଟି ପଞ୍ଚାୟତର ସରପଞ୍ଚ, ସମିତି ସଭ୍ୟସଭ୍ୟା ବ୍ଲକରେ କାର୍ଯ୍ୟରତ ଏପିଓ ସୁମନ୍ତ ଉଠାନ୍ ସିଂ, ସହକାରୀ ଯନ୍ତ୍ରୀ ଜୟ ପ୍ରକାଶ ଜେନା ଓ ସମସ୍ତ ବ୍ଲକ କର୍ମଚାରୀ ଉପସ୍ଥିତ ଥିଲେ । ଏହି ବ୍ଲକସ୍ତରୀୟ କ୍ରୀଡ଼ା ପ୍ରତିଯୋଗିତା ୪ ତାରିଖରୁ ଆରମ୍ଭ ହୋଇ ଆଗାମୀ ୧୩ ତାରିଖ ପର୍ଯ୍ୟନ୍ତ ଜାରି ରହିବ ବୋଲି ସୂଚନା ମିଳିଛି । ଏନେଇ ସମସ୍ତ ଦଳକୁ ୨ଟି ଗ୍ରୁପ ଏ ଓ ବିରେ ବିଭକ୍ତ କରାଯାଇଥିବାବେଳେ ବିଭିନ୍ନ କ୍ରୀଡ଼ା ଆୟୋଜିତ ହେବ ବୋଲି ସୂଚନା ରହିଛି । ଅନ୍ୟପଟେ ପ୍ରଥମ ଦିନରେ ଫୁଟବଲ୍ ପ୍ରତିଯୋଗିତା ଆରମ୍ଭ ହୋଇଥିବାବେଳେ ପ୍ରଥମ ଖେଳରେ ବ୍ଲକର କୁଏରି ମାଣ୍ଡୁ ସହ କ୍ରାଣ୍ଡି ବାଲି ଏବଂ ବାଲନ୍ଦା ପଡ଼ା ସହ ପଲା ବ୍ରୁଡୀ ମଧ୍ୟରେ ଅନୁଷ୍ଠିତ ହୋଇଥିଲା । ଅନୁରୂପ ଭାବରେ ଗ୍ରୁପ୍ ବିରେ ପବିଙ୍ଗିଆ ସହ ସାଡ଼ୀଙ୍ଗିଆ, ତଳ ଦଣ୍ଡିକିଆ ସହ ଭ୍ରୁଙ୍ଗି ଯୋଡ଼ି ମଧ୍ୟରେ ଅନୁଷ୍ଠିତ ହୋଇଥିଲା । ଆଜି ପ୍ରଥମ ଦିନର ଖେଳ ପ୍ରତିଯୋଗିତାରେ କାଣ୍ଡ୍ରିବାଲି, ପଲା ବ୍ରୁଡି, ପବିଙ୍ଗିଆ ଓ ବ୍ରୁଙ୍ଗିଯୋଡ଼ି କ୍ରମାନ୍ୱୟ ଭାବେ ବିଜୟୀ ହୋଇଥିବା ଜଣାପଡ଼ିଛି । ଅନ୍ୟପଟେ ଏହାର ଫାଇନାଲ ମ୍ୟାଚ ୯ ତାରିଖରେ ଅନୁଷ୍ଠିତ ହେବ ବୋଲି ବ୍ଲକ ପ୍ରଶାସନ ସୂଚନା ଦେଇଛି ।
